Ерөнхий сайд Л.Оюун-Эрдэнэ Өдрийн сонины сэтгүүлч Э.Энэрэлд бүрэн хэмжээний ярилцлага өгчээ. Түүний хувьд хэвлэлд төдийлөн нээлттэй бус, шууд дамжуулалтын ярилцлага ордоггүй зэрэг шүүмжлэлт өртдөг. Тэгвэл Өдрийн сонинд өгсөн энэхүү ярилцлагад хувийн болон хувьсгалын олон асуултад “бараг л нээлттэй” ярилцлага өгчээ. 

Ярилцлагын эздийн тухайд

• Өдрийн сонин нь 1998 оны гуравдугаар сарын 10-нд анхны дугаар хэвлэгдсэнээс өдгөө 7400 гаруй дугаараа гаргаад байна.
• Ерөнхий сайд Л.Оюун-Эрдэнийн ярилцлага нь тус сонины 2025 оны гуравдугаар сарын 10-ны дугаарт гарсан юм.
• Ярилцлагыг хийсэн сэтгүүлч Э.Энэрэл нь сэтгүүл зүйн салбарт 20 жил ажиллаж буй туршлагатайгаас гадна сэтгүүл зүйн салбарын хамгийн нэр хүндтэй шагнал болох БАЛДОРЖ шагналаар шагнуулж байжээ. 

Ярилцлагаас онцлох эшлэлүүд

1. Могой жилд худал хуурмаг гуужиж, үнэн бүхэн тодорно гэдэгт итгэж байна. Хаа сайгүй л баг хуулагдаж, прагматик чиг хандлага руу дэлхий чиглэж байна. 
2. Цар тахлаас хойш эдийн засаг тогтмол 5-7 хувиар өссөн. Энэ өсөлтийн үр дүнд нэг хүнд ногдох дотоодын нийт бүтээгдэхүүний хэмжээ сүүлийн гурван жил дараалан нэмэгдэж, 4,128 ам.доллароос 6,890 ам.доллар болж өслөө.
3. Засгийн газраас зарласан 14 мега төслийн 50 хувь нь хэрэгжиж эхэлбэл дотоодын нийт бүтээгдэхүүн 200 их наядад хүрэх боломжтой. 
4. MCS групптэй зөрчилдсөн юм биш, хууль зөрчсөн эсэхийг тодруулах асуудал. Улсын төсвөөр хайгуул хийгдсэн стратегийн ийм том ордын хувь хэмжээг тогтоосон эрх зүйн актуудад дүн шинжилгээ хийх нь аль ч улсын Засгийн газар, УИХ-д байх л ёстой хэм хэмжээ.
5. Засгийн газар Кока кола, Юнител эсвэл Скай резорт, Шангрилагийн түрээсийн асуудалд орооцолдоод байгаа зүйл огт биш, стратегийн орд хуулийн дагуу очсон эсэхийг л нягталж байгаа юм. 
6. УИХ, Засгийн газрын хурлаар хэлэлцэхгүйгээр олон улсад ордоо зарчихсаныг ярилцахгүй өнгөрөх улс гэж байхгүй л дээ.
7. Байгалийн баялгийг хэн ч бүтээж бий болгоогүй. Энэ газар нутгийн маань хөрсөнд байгаа баялаг. Нөгөө талдаа энэ баялгийг хөрөнгө оруулж байж ашиглах нь ойлгомжтой. Энэ хоёр ойлголтын эв нэгдлийн цэг бол Баялгийн сан.
8. MCS группийн хууль хамгаалалтын газар гүйцэтгэх ажиллагаа хийсэн асуудлыг шалгаж байна. Ийм байдал хэтэрвэл цаашид бие даасан цагдаа, армитай болох хүртлээ өргөжиж, эрх зүйт төрийн хэм хэмжээг давдаг муу жишээ олон бий.
9. Намайг данх, галч гэж нэрлээд Англид амьдардаг мэтээр зохиомол мэдээллүүд хэдэн нөхрөөс л явдаг юм даа. Ер нь яах вэ, Эби дарга маань намайг харц, өөрийгөө язгууртан л гэж ойлгуулах гээд байгаа бололтой.
10. С.Зоригийг хөнөөсөн хэргийн мөрдлөг маш олон хүний амьдралын цаг хугацааг бүхэлд нь сүйрүүлсэн. Би торлогдчихсон зүрхийг чөлөөлөхийг л хүссэн юм.
11. Ч.Лодойсамбуу Засгийн газрыг огцруулах санал гаргасан гээд Л.Гантөмөрийг холбож хардах нь үндэслэлгүй. Л.Гантөмөр, Т.Доржханд, Д.Амарбаясгалан, Г.Занданшатар дарга бидний хувьд түүхэн хариуцлагын нэг завинд сууцгаасан улстөрчид болсон.
12. Ерөнхий сайд хийх нь олон улс, ордон, олон нийт гэсэн гурван динамикийн дундах цэг. Гачлантай нь энэ гурав өөр өөр тийшээ зөрж эргэдэг урвуу хамааралтай.
13. Алдаа гаргахаас айх цаг одоо биш. Харин эс үйлдэл хийхээс илүү айх учиртай.
14. Ерөнхий сайд бол ерөнхий мишок юм. Хүн бүр л нүддэг. Өөр бас хэнийгээ ч шүүмжлэх билээ.
15. М.Энхболд даргатай хэвийн харилцаатай байгаа. Үндэсний аюулгүй байдлын зөвлөлийн гишүүнээр ажиллаж байсан хүмүүсийг тусгай үүрэгт элчин сайдаар ажиллах урилгыг хүргүүлнэ.