Хотын дарга Х.Нямбаатар хэвлэл мэдээллийн хэрэгслээр автомашины бизнес эрхлэгчдийг хэдэн “халтар төгрөг цуглуулсан шуналтай ченжүүд” гэх зэргээр хэлсэн.

Тэгвэл уг асуудлаар бизнес эрхлэгчдийн төлөөлөл болох “Эко автомашин импортлогчдын холбоо” НҮТББ нь Нийслэлийн Засаг дарга бөгөөд Улаанбаатар хотын Захирагч Х.Нямбаатарт холбогдуулан ажил хэргийн нэр хүндийг сэргээлгэж, 1 тэрбум төгрөг гаргуулах шаардлага бүхий нэхэмжлэлийг Хан-Уул дүүргийн иргэний хэргийн анхан шатны шүүхэд гаргаад байсан юм. Тэд ийнхүү нэхэмжлэл гаргахдаа тухайн үнийн дүн болох тэрбум төгрөгийг битүүмжилж, шүүхээс гарах шийдвэрийн биелэлтийг баталгаажуулах хүсэлт гаргасан юм байна. 

Хүсэлтийг Хан-Уул дүүргийн иргэний хэргийн анхан шатны шүүхэд хэлэлцэж, бизнес эрхлэгчдийн хүсэлтээр Х.Нямбаатараас тэрбум төгрөгийг битүүмжлэхээр шийдвэрлэсэн.

Тэгвэл Хотын дарга Х.Нямбаатар энэ асуудалд тайлбар өглөө. Тэрээр "Надад тэрбум төгрөг байхгүй. Ченжүүдтэй давж заалдана. Маргааш 14.00 цагаас миний гаргасан гомдлыг хэлэлцэнэ. Намайг ченжүүд жил гаруй шантаажилж байна. Би уучлалт гуйхгүй. Манай зам дээр 80 мянган машин зорчих ёстой. Гэтэл үүнээс 10 дахин их машин зорчиж байна. Ченжүүд жилд 130 мянган машин импортолж байна. Ингэхдээ татвар төлөхгүй, чанар стандарт хангахгүй, нүүрсэн яндангүй машин оруулж ирдэг. Улсын дугаарын бизнесийг цэцэглүүлж байна" гэлээ. 

Ташрамд сонирхуулахад, Х.Нямбаатар нь

• Өөрөө жилийн 54 сая төгрөгийн, гэр бүл нь 28 сая төгрөгийн орлоготой. 
• Нэг тэрбумын барилга, орон сууцтай
• 292 саяын Суудлын жижиг машин, Жийп болон туулах чадвар өндөр Toyota Land Cruiser 200-тай
• 217 саяын малтай
• 100 саяын газартай
• 21 саяын хадгаламжтай
• 82 саяын зээлтэй юм байна.