Засгийн газрын ээлжит хуралдаанаар Гашуунсухайт-Ганцмод чиглэлийн төмөр замын хэлэлцээрийг УИХ-д өргөн барих шийдвэр гаргалаа. УИХ-ын чуулган нээгдэнгүүтээ уг асуудлыг хэлэлцэх аж. 

Энэ талаар Аж үйлдвэр, эрдэс баялгийн сайд Ц.Туваан "Хэлэлцээрийг УИХ баталснаар компани хоорондын гэрээ хийж, Чайна-Энержи компанид 5 сая тонн коксжих болон бусад нүүрсийг борлуулах нөхцөл бүрдэнэ. Энэхүү хэлэлцээрийг зөвхөн Ганцмод-Гашуунсухайтын хил дээр хийж байгаа юм биш. Цаашид Ханги-Мандал, Шивээхүрэн-Сэхэ, Бичигт-Зүүнхатавч хил дээр хэрэгжүүлнэ. Мөн хоёр улсын баруун зүүн коридорыг байгуулах асуудал үргэлжилнэ" гэлээ. 

Үүнээс гадна түүнээс уул уурхайн салбарын зарим асуудлын талаар тодруулахад дараах хариултыг өглөө. 

-Уул уурхайн биржийн үйл ажиллагаа доголдлоо, захиалагч орж ирэхгүй байна гэх мэдээлэл байна?

-Уул уурхайн биржээр худалдаалдаг. Үүнд, нүүрс, зэс, төмрийн хүдэр, жонш, цайр орно. Үүнд төлөвлөгөө гаргаж, олборлолт экспортоо нэмэгдүүлнэ. Өөрөөр хэлбэл, нэг бүтээгдэхүүний үнэ унахад нөгөө бүтээгдэхүүнээр нөхнө гэсэн үг юм. 

-Төсөвт тодотгол хийх үү?

-Төсөвт тодотгол хийх нөхцөл байдал үүсээгүй. Мэдээж тооцоолоогүй зүйлс гарч ирсэн. Үүнийг хаа хаанаа бүгд мэдэж байгаа. Зөвхөн манай улсад ч биш олон улсад гарч буй хүндрэл. Энэ байдлаас яаж хохирол багатай гарах, "Б" төлөвлөгөөндөө орно. Бид үүнээс хүнд нөхцөл байдал орлогоо тасалдуулаагүй. Тиймээс энэ удаад ч гэсэн адилхан байна. Тухайлбал, биржээр арилжаалдаг бүтээгдэхүүний хэмжээг нэмэгдүүлэх замаар энэ хүндрэлээс гарна.