Засгийн газрын ээлжит хуралдаанаар төсвийн орлогын биелэлттэй танилцсан байна. 2025 оны хоёрдугаар сарын байдлаар төсвийн орлого 95 хувьтай биелсэн аж.

Энэ талаар Сангийн сайд Б.Жавхлан "Эхний хоёр сарын гүйцэтгэлээр төсвийн орлого 95 хувьтай гарсан байна. Энэ нь томоохон цочрол байхгүй харуулж байгаа учир төсвийн тодотгол хийхгүй. Төсвийн тухай хуулиар 5 нөхцөл үүсвэл төсөвт тодотгол хийх ёстой. Түүний нэг нь орлого тасарсан, эсвэл төсвийн алдагдал ДНБ-ий 3 хувиас давбал гэж заасан байдаг. 2025 оны төсөв алдагдалгүй баталсан. Тиймээс орлого тасарвал алдагдал үүснэ. ДНБ-ий 3 хувь гэдэг нь 3 орчим их наяд гэсэн үг. Тэгэхээр энэ хэмжээний орлого дутсан зүйл байхгүй. Дөнгөж гуравдугаар сард тодотгол ярих нь эрт байгаа юм. 

Харин валютын нөөцийг хэвийн байлгаж, нэмэгдүүлэх ажлыг Сангийн сайд миний бие анхаарна. Экспортоор гарч буй бүтээгдэхүүний биет хэмжээ хэвийн байгаа. Өчигдрийн авсан мэдээгээр эхний хоёр сарын байдлаар

• 10.5 сая тонн нүүрс гаргана гэж тооцоолж байсан бол 11.5 сая тонн нүүрс гарсан
• 254 мянган тонн зэсийн баяжмал гаргахаар төлөвлөсөн бол одоо 281 мянган тонн гаргасан
• Алтны үнийг 1850 доллараар төсөөлсөн бол одоо 3000 орчим доллар болоод байна. Ийнхүү Төв банк 300 кг алт экспортолно гэж тооцоолсон бол одоогийн байдлаар 1.8 тонн алт экспортлоод байна. Энэ нь 6 дахин их үзүүлэлт юм. Алтны үнэ өндөр байгаа энэ цонх үеийг ашиглан алтны экспортыг нэмэгдүүлнэ.