А.Азбаяр болон бусад тоглогчид хэрхэн улирлын шилдгээр тодорсон бэ

.Graph
2025-03-13

МСБХ-ны Үндэсний дээд лигийн  2024-2025 оны улирлын шилдгүүдийг шалгаруулах “The League season awards” ёслол өнөөдөр болж, хамгийн үнэ цэнтэй тоглогч буюу MVP-ээр Хасын Хүлэгүүд багийн тоглогч А.Азбаяр тодорсон. 

Сагсан бөмбөг үзэгч, дэмжигч, сонирхогчдын зүгээс энэ улирлын MVP нь статистик үзүүлэлтээрээ тэргүүлж буй “BCH Knights” багийн тамирчин О.Эрдэнэцогт болох байсан гэж таамаглаж байсан. Үүнээс үүдэн энэ улирлын MVP-г хэрхэн тодруулсан цахим орчинд маргаж, МСБХ-г шүүмжлээд буй. 

Тэгвэл МСБХ-ны зүгээс улирлын шилдгүүдийг хэрхэн тодруулдаг талаар нийтэлжээ. 

MVP

Тус шагналыг олгохдоо Үндэсний дээд лигийн хамгийн өндөр амжилттай багийн статистик үзүүлэлтээр тэргүүлж буй тоглогчид олгодог.

Лигийн 2022-23 улиралд Эрдэнэт майнерс баг улирлыг 16-2 амжилттай тэргүүлж тус багийн тоглогч Т.Санчирт, 2023-24 оны улиралд Эрдэнэт Майнерс, Бишрэлт Металл, IHC APES /SG APES/ багууд 19 – 5 гэсэн амжилттайгаар амжилт нь тэнцүү өндөрлүүлсэн ба энэ гурван багийн хоорондын тоглолтод тоглогчдын үзүүлсэн статистик болон улирлын дундаж статистик үзүүлэлтийг харгалзан М.Өлзий-оршиход  MVP болсон.

Үндэсний дээд лигийн 2024-25 улирлыг 19 хожил 8 хожигдол гэсэн амжилтаараа тэргүүлсэн багийг А.Азбаяр нь 11.5 оноо, 6.6 самбар, 1 оновчтой дамжуулалт, 1.3 блок шот дунджлан багаа тэргүүлсэн учир MVP шагналыг олгосон юм.

Most Improved Player

Амжилт нь ахисан тоглогчийг тодруулахдаа өнгөрсөн улирал буюу 2023-24 оны улирлын статистик болон 2024-25 улирлын статистик үзүүлэлт хамгийн ихээр ахиж багтаа үр нөлөө үзүүлсэн тоглогчид олгодог.  Г.Болор-Эрдэнэ нь өнгөрөгч 2023-24 улиралд 7,4 оноо 2,2 самбар, 4 оновчтой дамжуулалт дунджилж байсан бол 2024-25 улиралд 14.5 оноо, 3.1 самбар, 5.1 оновчтой дамжуулалт дунджилж амжилт нь хамгийн ихээр ахисан статистик үзүүлсэн учир шалгарав.

Rookie of the year

Тус шагнал нь шинэ залуу тоглогчид дотроос хувийн статистик үзүүлэлтээрээ тэргүүлсэн тоглогчид олгогддог бөгөөд 2024 оны драфтын 1-р сонголт М.Чинхутаг нь 5.8 оноо, 1.8 самбар, 0.6 оновчтой дамжуулалт дундажлан  лигт рүүки улиралдаа тоглож буй тоглогчоо тэргүүлсэн юм.

6th player

Шилдэг 6-дах тоглогчийг шалгаруулах үндсэн зарчим нь тухайн тоглогч нь улирлын тоглолтын 60%-аас дээш тоглолтод багийнхаа сэлгээнээс тоглосон байх үндсэн шаардлагатай лигийн 10 багийн тоглогчдын сэлгээнээс тоглосон тоо болон статистик үзүүлэлт багийн амжилтад харгалзан үзсэн. ЭС ЖИ ЭЙПС багийн тоглогч Н.Ганбаатар улиралд нийт 26 тоглолтод оролцохдоо 18-д нь сэлгээнээс тоглон 7.1 оноо 4 самбар, 0.6 оновчтой дамжуулалт дунджилсан статистик нь лигийн бусад сэлгээний тоглогчдыг тэргүүлсэн үзүүлэлт учир олгосон. Түүнтэй хамгийн ойр өрсөлдсөн тоглогч нь Эрдэнэт Майнерс багийн тоглогч А.Бямбадорж 16 тоглолтод сэлгээнээс оролцохдоо 5 оноо 2 самбар дунджилж байсан.

DPOY

Улирлын шилдэг хамгаалан тоглогчийг тодруулахдаа багийн хамгаалалтаар лигийн тэргүүлж буй буюу нэг тоглолтод хамгийн бага оноо алдаж буй багийн хамгаалалтын хамгийн өндөр үзүүлэлттэй тоглогчид олгодог. Улиралд хамгийн бага оноо буюу 73.3 оноо эсрэг багтаа Хасын Хүлэгүүд баг.

А.Азбаяр нь улирлын турш 62 бөмбөг таслалт 73 блок шот 115 хамгаалалтын самбар авч, хамгаалалтын рейтинг 88% гэсэн үзүүлэлтээр багтаа хамгийн өндөр үзүүлэлттэй байсан учир тус шагналыг олгов.

Best International player

Улирлын шилдэг гадаад тоглогчийн шагналыг олгохдоо лигт өрсөлдөж буй нийт гадаад тоглогчдод улирлын тоглолтын 70%-иас дээш тоглолтод тус багтайгаа тоглон хувийн статистикаараа бусад тоглогчдоо тэргүүлж буй тоглогчид дотроос багийн амжилтыг харгалзан олгов. Бишрэлт Металл багийн тоглогч Байрон Уэсли ЖР нь багтайгаа нийт 20 тоглолтод оролцохдоо 16 хожил буюу 80% хожлын рейтингтэйгээр 23.2 оноо, 6.2 самбар, 5.8 самбараас бөмбөг авалт дунджилсан учир тус шагналыг олгов.

Дээрх шийдвэрийг МСБХ-ны Удирдах зөвлөлөөс томилогдсон Үндэсний дээд лиг зохион байгуулах Ажлын хэсэг хуралдаж гаргадаг болно гэжээ.

Сэтгэгдэл үлдээх

Newsletter Subscribe