Эмнэлгийн түргэн тусламжийн автомашин Төв аймагт осолдож 6 хүн нас барж, хоёр хүүхэд гэмтсэн. Тэгвэл ослын улмаас хүргэгдэж ирсэн 2 хүүхдийн биеийн байдал тогтворжиж байна. Тухайлбал, 7 настай хүүхдийг өнөөдрөөс энгийн тасагт шилжүүлсэн бол, 14 настай хүүхдэд дунд чөмөг болон шилбэний ясны хугарал бэхлэх мэс засал эмчилгээ хийж, Эрчимт эмчилгээний тасагт шаардлагатай тусламж үйлчилгээг үргэлжлүүлэн үзүүлж байна гэж Гэмтэл согог судлалын үндэсний төвөөс мэдээллээ.

Ослыг эргэн сануулахад, 

Төв аймгийн Өндөрширээт сумын нутаг дэвсгэрт орших Талын уул гэх газар буюу Улаанбаатар-Арвайхээр чиглэлийн авто замын 170 дахь км орчимд “Toyota Hiace” маркийн автомашины жолооч нь Улаанбаатар хотоос Завхан аймгийн чиглэлд зорчиж явсан “Kia Grandbird” маркийн том оврын автобустай мөргөлдсөн юм.

Ослын улмаас “Toyota Hiace” маркийн автомашинд зорчиж явсан таван хүн, жолоочийн хамт нийт зургаан хүн нас барж, хоёр хүүхэд гэмтсэн билээ.