“Хашаандаа сайхан амьдаръя” төслийн санаачлагч Ц.Түмэнбаярт “Экоресурс” ХХК-ийн гомдлоор шүүхээс тэрбум төгрөгийн нэхэмжлэх иржээ. 

Тодруулбал, өнгөрсөн нэгдүгээр сард нийслэлээс зорилтот бүлгийн иргэдэд 28.3 тэрбум төгрөгөөр 32 мянган зуух олгох тухайгаа мэдэгдэж, “Нүүдэлчин” гэх зуухыг тарааж байсан. 

Улмаар нэгдүгээр сарын 23-24-нд Баянгол дүүргийн 22 дугаар хороонд гэр бүлийн зургаан хүн угаартаж нас барсан харамсалтай хэрэг гарсан. Тэгвэл тус айлд ч “Нүүдэлчин” зуух олгоод байжээ. Ийнхүү зургаан хүн харамсалтайгаар эндсэн хэргийн дараа буюу нэгдүгээр сарын 30-нд 32 мянган зуух тараах тендерийг цуцлах шийдвэрийг гаргасан байдаг. Нүүдэлчин зуух нь утааг бууруулж, 100 хувь угаарын хийгээс сэргийлдэг гэх тодотголтой бөгөөд байшинд ашиглах боломжгүй, зөвхөн монгол гэрт галлах заавартай.

Харин тэрбум төгрөгийн нэхэмжлэх шүүхээс авсан Ц.Түмэнбаяр нь 28.3 тэрбум төгрөгөөр 32 мянган зуух тараах асуудлыг хүчтэй эсэргүүцэж, шүүмжилж байсан бөгөөд “Нүүдэлчин нэртэй халдаггүй, дүлий, төмрийн хогийг иргэд 2-7 хоног хэрэглээд гаргаж хаяж байна” хэмээн цахим хуудастаа зураг, бичлэг оруулж байсан. 

Тэгвэл түүний уг постоос нь болж “Нүүдэлчин” зуухыг нийлүүлсэн “Экоресурс” компани шүүхэд ийнхүү нэхэмжлэх гаргажээ. 

“Хашаандаа сайхан амьдаръя” төслийн санаачлагч Ц.Түмэнбаяр нь энэ тухайгаа цахим хаягтаа хуваалцсан бөгөөд “Нийслэлд 28.5 тэрбум төгрөгийн 32 мянган стандартын шаардлага хангахгүй зуух шахах оролдлого хийж байсан нөхөд намайг шүүхэд өгч нэг тэрбум төгрөг нэхэмжилсэн байна. Өнгөрсөн 12 сард БГД-т шахсан 2000 зуухыг нь иргэд ашиглахгүй гаргаж хаясан тухай баримтыг нь би дэлгэсэн юм. Тэгэхээр иргэдийн хэрэгцээ шаардлага хангахгүй байгаа 2000 зуух шахсан асуудлаар нь шүүхэд гомдол гаргахаа албан ёсоор мэдэгдэж байна. Татвар төлөгчдийн 2 тэрбум төгрөгийг төмрийн хог болгосноо тайлбарлаарай, Экоресурс ХХК!” хэмээжээ.