Үндэсний статистикийн хорооноос улсын нэгдсэн төсвийн эхний 2 сарын гүйцэтгэлийн тоон мэдээг хүргэлээ. Уг мэдээллийг харвал, эхний 2 сард нийт орлого 4.1 их наяд, нийт зарлага 4.6 их наяд болж улсын төсөв 565.8 тэрбум төгрөгийн алдагдалтай гарчээ. Төсөв алдагдалтай болоход нөлөөлсөн хамгийн чухал үзүүлэлт нь татварын орлого байна. Татварын нийт орлого өмнөх оны мөн үетэй харьцуулахад 1.1 их наяд төгрөгөөр буурчээ. 

1.2 их наяд - Улсын нэгдсэн төсвийн нийт орлого, тусламжийн хэмжээ өмнөх оны мөн үеэс 1.2 их наядаар буурч, 4.1 их наяд болжээ. Энэ нь 22.9 хувиар буурсан үзүүлэлт. 

830.4 тэрбум - Улсын нэгдсэн төсвийн нийт зарлагын хэмжээ өмнөх оны мөн үеэс 830.4 тэрбумаар өсөж, 4.6 их наяд болов. Энэ нь 22.1 хувиар өссөн үзүүлэлт. 

565.8 тэрбум - Улсын нэгдсэн төсвийн нийт алдагдал. 

1.1 их наяд - Татварын нийт орлого 1.1 их наядаар буурч, 3.8 их наяд төгрөг боллоо. Энэ нь өмнөх оны мөн үеэс 22.9 хувиар буурсан үзүүлэлт. 

591.5 тэрбум - Орлогын албан татварын орлого 591.5 тэрбум төгрөгөөр буурлаа. Энэ нь өмнөх оны мөн үеэс 30.3 хувиар буурсан үзүүлэлт юм. Уг татварыг ААН, хувь хүн аль аль нь төлдөг. 

542.2 тэрбум - Ашигт малтмалын нөөц ашигласны төлбөр 542.2 тэрбум төгрөгөөр буурлаа. Энэ нь өмнөх оны мөн үеэс 65.5 хувиар буурсан үзүүлэлт. 

Төсөв тодотгохгүй 

Сангийн сайд Б.Жавхлан "Эхний хоёр сарын гүйцэтгэлээр томоохон цочрол ажиглагдаагүй тул төсвийн тодотгол хийхгүй. Төсвийн тухай хуулиар тодотгох нөхцөл үүсвэл төсөвт тодотгол хийх ёстой. Түүний нэг нь орлого тасарсан, эсвэл төсвийн алдагдал ДНБ-ий 3 хувиас давбал гэж заасан байдаг. 2025 оны төсөв алдагдалгүй баталсан. Тиймээс орлого тасарвал алдагдал үүснэ. ДНБ-ий 3 хувь гэдэг нь 3 орчим их наяд гэсэн үг. Тэгэхээр энэ хэмжээний орлого дутсан зүйл байхгүй. Дөнгөж гуравдугаар сард тодотгол ярих нь эрт” гэв.