Ираны дэмжлэгтэй Йемений хоуситуудын цэргийн жигүүрийн төлөөлөгч Яхья Сариа Улаан тэнгист байрлаж буй АНУ-ын цэргийн хөлөг онгоцнууд руу дайрсан тухайгаа мэдэгджээ. 

Тэрээр Америкийн нисэх онгоц тээгч хөлөг онгоц руу 24 цагийн дотор хоёр удаа дайрсан гэдгээ мэдэгдэж, үүнийгээ "АНУ-ын манай улсын эсрэг үргэлжилсэн түрэмгийллийн хариу үйлдэл" гэж мэдэгджээ. Тодруулбал 3 сарын 16-нд шилжих шөнө эхлүүлсэн АНУ-ын ажиллагааны хариуд ийнхүү тус улсын цэргийн хөлөг онгоцнууд руу дайрсан байна. Улаан тэнгист байрлаж буй Америкийн хөлөг онгоцнуудаас буудсаны улмаас 53 орчим хүн амиа алдаж, 98 хүн шархадсан гэж хуситуудын хяналтад байдаг Эрүүл мэндийн яам мэдээлсэн юм. Харин Цагаан ордноос мэдээлснээр, тус бүлэглэлийн хэд хэдэн өндөр албан тушаалтан амь үрэгджээ. 

Хоуситууд эхлээд Улаан тэнгис дэх "Нисэх онгоц тээгч USS Harry Truman болон түүнийг дагалдан яваа байлдааны хөлөг онгоцнууд" руу 18 пуужин, нисгэгчгүй онгоц харвасан бөгөөд хэдэн цагийн дараа хоёр дахь удаагаа харвасан гэж мэдэгдэв.

Нэрээ нууцлахыг хүссэн АНУ-ын албаны хүний ​​хэлснийг эш татан "Reuters" агентлагийн мэдээлснээр, Америкийн нисэх онгоцууд 11 нисгэгчгүй онгоцыг сөнөөж хоуситуудын харвасан пуужингууд агаарт дэлбэрч, Йемений усан нутаг дэвсгэрт унасан байна. Тодруулбал, дронуудын 10-ыг АНУ-ын Агаарын цэргийн хүчний сөнөөгч онгоцнууд, нэгийг нь Тэнгисийн цэргийн хүчний F/A-18 сөнөөгч онгоцоор саатуулсан байна. 

АНУ-ын Ерөнхийлөгч Дональд Трамп “Босогчид Улаан тэнгисийн усан онгоц руу дайрахаа болих хүртэл Йемен рүү цохилтоо үргэлжлүүлж, асар их үхлийн хүч хэрэглэнэ” гэж анхаарууллаа.