АНУ-ын Ерөнхийлөгч Дональд Трамп энэ долоо хоногт ОХУ-ын Ерөнхийлөгч Владимир Путинтэй гурван жил үргэлжилсэн дайныг зогсоох арга замын талаар ярилцах төлөвтэй байна. Энэ талаар АНУ-ын төлөөлөгч Стив Виткофф ням гарагт Москвад Путинтэй хийсэн уулзалтаасаа буцаж ирснийхээ дараа CNN-д ярьжээ. Мөн тэрээр “Бид Украйнчуудтай үргэлжлүүлэн уулзаж, ярилцаж байна. Трамп, Путин хоёрын яриа үнэхээр сайн, эерэг байх болно" гэж бодож байгаагаа нэмж хэлсэн юм.

Трамп "Бид энэ дайныг дуусгаж чадах эсэхийг харахыг хүсэж байна. Бид чадна, чадахгүй ч байж магадгүй, гэхдээ надад боломж байгаа гэж бодож байна" хэмээн ням гаргийн орой “Air Force One” онгоцонд явж байхдаа хэлжээ.

Трамп баасан гарагт олон нийтийн сүлжээнд “Энэ аймшигт цуст дайн эцэстээ дуусах магадлал маш өндөр байна” гэж мэдэгдсэн юм. Тэрээр мөн Оросын Курскаас шахан гаргаж буй Украйны олон мянган цэргийг устгахгүй байхыг Путинаас "хүчтэй шаардсан" гэжээ. Путин хэрвээ Украйны цэргүүд бууж өгвөл тэдний амийг өршөөх тухай Трампын хүсэлтийг хүндэтгэх болно гэдгээ мэдэгдээд байсан юм.