Монгол Улсын Засгийн газрын ээлжит хуралдаанаас гарсан шийдвэрүүдийн талаар танилцууллаа. 

Нийслэлийн Засаг дарга бөгөөд Улаанбаатар хотын Захирагч Х.Нямбаатар: 

- Өнөөдрийн хуралдаанаар Улаанбаатар хотын агаарын бохирдлыг бууруулах чиглэлээр авах арга хэмжээний тухай тогтоолыг албажуулан баталлаа. Өөрөөр хэлбэл, агаарын бохирдлын гол эх үүсвэрүүдийн нэг болох нүүрс түлдэг 200 мянган айлын 32-50 мянган айлыг хийн шилжилтэд шилжүүлэх тогтоолын төслийг баталлаа. Үүний тулд айлууд дулаан алдагдлаа бууруулж, дулаалгаа стандартад нийцүүлэн, өөрсдөө хатуу түлшнээс татгалзсан тохиолдолд нийслэлээс хийн түлшний зуухыг байрлуулж, аюулгүй ажиллагааны зааврыг өгнө.

Мөн хийн түлшний хэрэглээнд шилжсэн тохиолдолд 9 сарын 15-наас 5 сарын 15 хүртэл сар бүр 100 мянган төгрөгийн татаас олгох зохицуулалтыг албажууллаа. 

Нийслэлд өдгөө 200 мянган айл хатуу түлш буюу нүүрс хэрэглэж буй. Үүнээс гадна 2500 орчим нам даралтын зуух, 170 орчим дунд оврын уурын зуух өнөөдрийн агаарын бохирдлыг үүсгэж байна. Мөн нийслэлд өдөрт авто тээврийн улсын бүртгэлд бүртгэлтэй 804 мянган тээврийн хэрэгслээс 500-600 мянга гаруй тээврийн хэрэгсэл хөдөлгөөнд оролцож, ТЭЦ 2, 3, 4 болон Амгалангийн ДЦС гэх эх үүсвэрүүд агаарын бохирдлыг бүрдүүлж байна. 

Хотын дарга үргэлжлүүлэн “Монгол Улсын Засгийн газрын тухай хуульд заасны дагуу бүх яамнуудын чиг үүрэгт агаарын бохирдлыг бууруулах чиг үүрэг орсон байдаг. Уг чиг үүргийнх нь дагуу яамнуудыг хийн түлшинд шилжиж байгаа гэр хорооллын айлуудын бүсчлэл дээр хуваарилан ажиллуулах шийдвэр гарлаа. Яамнууд айл өрхүүдийн дулаалгын стандартыг сахиулж, дэмжлэг туслалцаа үзүүлэх юм. Уг ажилд хилийн цэрэг, зэвсэгт хүчин, төрийн цэргийн байгууллагууд, төрийн өмчит байгууллагуудыг дэмжлэг үзүүлж оролцуулах агуулга мөн тогтоолд тусгагдсан” гэв. 

Ташрамд, Монгол Улсын хийн түлшний жилийн хэрэглээ 46 мянган тонн байгаа. 32-50 мянган айлыг хийн түлшинд шилжүүлснээр энэ хэрэглээ хамгийн багадаа 100 мянган тоннд хүрэх магадлалтай.