“Ноорог” сайттай холбоотой асуудал болон хэвлэн нийтлэх эрх чөлөөтэй холбоотой асуудлаар Монгол Улсын Засгийн газрын өнөөдрийн хуралдаанаар хэлэлцэж, хүний эрх, эрх чөлөөг зөрчсөн байна уу, үгүй юу гэдгийг Хууль зүй, дотоод хэргийн сайд О.Алтангэрэл засгийн газрын гишүүдэд танилцуулжээ. 

Уг танилцуулгатай холбоотойгоор Хууль зүй, дотоод хэргийн сайд О.Алтангэрэл дараах мэдээллүүдийг өгч, хуулийн нэр томьёонуудыг тайлбарлав. Тухайлбал, 

• Хувь хүний нууцтай холбоотой асуудал яригдаж байгаа учир дэлгэрэнгүй мэдээлэл өгөх боломжгүй. Гэхдээ энэ хүрээнд шалгагдаж байгаа нэр бүхий хүмүүс 2024 оны 6 сар, 9 сараас эхлэн эрүүгийн хуулийн тусгай ангийн холбогдох зүйл ангиудаар шалгагдаад явж байсан. Энэ бол гэнэт болчихсон үйл явдал биш. Одоо хүртэл шалгагдаж байна.

Өнөөдөр энэ хэрэгт 2 хүн дээр эрүүгийн хэрэг үүсээд, шалгагдаж байна. 

• Цагдаагийн байгууллагаас авсан мэдээллээр шалгагдаж байгаа хүний зургаан дансаар нийтдээ 9.3 тэрбум төгрөгийн цахим мөрийтэй тоглоомын гүйлгээ дамжсан байна. Үүнтэй холбоотойгоор 2024 оны есдүгээр сараас эхлэн Эрүүгийн хэргийн заалт буюу бусдыг амиа хорлоход хүргэсэн заалтаар шалгагдаж байгаа. Цаана нь хохирогч байгаа шүү. Энэ мэдээллийг баталгаажуулсны үндсэн дээр олон нийтэд мэдээлэл өгч байна. 
• Хэрэв өчигдөр цагдаагийн байгууллагаас өгсөн мэдээлэл дунд буруу ташаа мэдээлэл байвал энэ нь өөрөө Эрүүгийн хуульд зааснаар гэмт хэрэг болно. Эрүүгийн хэрэг хянан шийдвэрлэх ажиллагаа бол бүх процесс нь хуульд заасан журмын дагуу явдаг ажиллагаа. Нэг л буруу гишгэвэл хүний эрх зөрчигдөж, хууль бус болдог. Энэ ажиллагааг хийсэн хүн өөрөө эрүүгийн хариуцлагад татагддаг. Тэгэхээр цагдаагийн байгууллагаас өгсөн мэдээлэл бол ардаа өндөр хариуцлагатай байдаг. 
• Хойшлуулшгүй ажиллагаа бол тухайн нөхцөл байдалд ажиллагаа явуулж, үйл явдалтай холбоотой баримт нотолгоог цуглуулдаг ажил. Цагдаагийн байгууллага хойшлуулшгүй ажиллагааг өдөрт хэдэн арваар нь, сард хэдэн зуугаар нь хийдэг. Нэг удаа хийчихсэн юм биш. Жишээ нь, манай хүүхдийг шөнө хүн зодчихлоо гэвэл араас нь хөөгөөд барьдаг, манай усны тэргийг хулгайлчихлаа гэвэл ойр орчмын айлын хашаагаар нь явж нэгжлэг хийдэг л ажиллагаа. 
• Баривчилгаа огт болоогүй. Учир нь хойшлуулшгүй журмаар хүнийг баривчилбал прокурорын зөвшөөрөл авдаг. Ямар ч албан ёсны баривчилгаа яваагүй. Харин компьютер, техник хэрэгсэл, эд хэрэгсэлд үзлэг хийсэн, түүнийгээ баримтжуулсан үйл ажиллагаа явагдсан. ХЗДХ-ийн сайдын хувьд хэвлэн нийтлэх эрх чөлөөнд ямар нэг байдлаар халдсан байна уу, хэвлэн нийтлэх гэж буй контентын агуулгатай холбоотой байна уу гэдэгт анхаарч ажиллана. 
• Би өмгөөлөгчөөр олон жил ажилласан тул өмгөөлөгч нарт нь хандаж үг хэлмээр байна. “Процессын алдаа гарсан гэж үзвэл гомдлоо гаргаад, шалгуулах ёстой”. Өмгөөлөгчдийн дурдсан зарим үйл баримт үнэн бол энэ үйл ажиллагаанд оролцсон хүмүүс өөрсдөө эрүүгийн хариуцлага хүлээнэ. Ажил албан тушаалтай холбоотой хариуцлага биш эрүүгийн хариуцлага шүү. 

Би энд өгсөн мэдээлэл, үг, цэг, тасал бүрийнхээ төлөө хариуцлага хүлээнэ гэв.

Уг асуудалд Ноорог студийн үүсгэн байгуулагч О.Уламсайхан дараах тайлбарыг өглөө.

Тэрбээр "Гар утас, компьютер ажлын хэрэгслүүдээ бүгдийг авч чадаагүй байгаа, нэг ёсондоо хувийн харилцаа холбооныхоо боломжуудыг бараг хаалгаад 2 хонож байж арай гэж симээ сэргээлгэж авлаа. Одоо сошиал дээр хувь акк-аараа ч болсон бичээд явна! 9.3 тэрбум төгрөг олдог, мөрийтэй зохион байгуулдаг гээд бүтэн Яамны сайд хүний ярьж байгаа юмнуудыг бол анх удаа өчигдөр л сонслоо. Хэрвээ тийм мөнгө олдог, эсвэл MCS-ээс лаг лаг санхүүжилт авдаг байсан бол сая 15-ны цалингаа хугацаанд нь тавьчихгүй юу, хулгайч юм аа. Ямартай ч "Тогосоо Тижи" гэж амиа хорлох гээд манайд гомдол гаргаж, манайхыг бариулсан аккаунт нь нэг сайтын бүр жинхэнээсээ Тролл акк байсан шүү! Юмаа авмаар байна аа хүүш!!!" гэжээ.