Олон улсын олимпын хороо (ОУОХ)-ны Гүйцэтгэх зөвлөл боксын спортыг 2028 оны Лос Анжелесийн олимпын наадамд оруулахыг зөвшөөрөв.

"Лос анжелес 2028" олимпын хөтөлбөрийг 2022 онд баталсан. Энэ үед бокс багтаагүй байсан ч өнгөрсөн сард “Дэлхийн бокс” байгууллага боксын спортыг олон улсын спортын удирдах байгууллагаар түр хугацаанд хүлээн зөвшөөрүүлсэн. Ингэснээр нөхцөл байдлыг өөрчилсөн байна. Олон улсын олимпын хорооноос гаргасан энэхүү зөвлөмжийг энэ долоо хоногт Грект эхэлсэн ОУОХ-ны хуралдаанаар батлах шаардлагатай. ОУОХ-ны ерөнхийлөгч Томас Бах энэ талаар эцсийн шийдвэр эерэг гарах нь тодорхой гэж үзэж байна. Тэрээр "Дэлхийн боксчид Лос Анжелесийн олимпод оролцох боломжтой болно" гэж мэдэгджээ.

"Дэлхийн бокс" нь 2023 оны 4-р сард байгуулагдаж, одоогоор 84 гишүүнтэй болоод байна. Өнгөрсөн сард ОУОХ тус байгууллагыг түр хугацаанд хүлээн зөвшөөрөх гол шаардлагуудыг хангасан гэж үзжээ. “Дэлхийн бокс”-ын ерөнхийлөгч Борис ван дер Ворст энэ шийдвэрийг “олимпын боксын хувьд маш чухал үйл явдал” хэмээн онцолж, спортын ирээдүйд нааштай өөрчлөлт авчирна гэж мэдэгджээ.

"Олимпын хөдөлгөөний нэг хэсэг байх нь нэр төрийн хэрэг. Хэрэв бокс LA 2028 олимпын хөтөлбөрт багтвал бид Олимпын хартийн үнэт зүйлсийг чанд мөрдөж, найдвартай, хариуцлагатай түнш байх болно" гэж тэр хэлсэн байна.

ОУОХ-ны зүгээс зөвхөн "Дэлхийн бокс"-ын гишүүн үндэсний холбоодын тамирчид 2028 оны олимпын эрхийн тэмцээнүүдэд оролцох боломжтой гэж мэдэгдсэн бөгөөд эрхийн тэмцээнүүдийн товыг хараахан зарлаагүй байна.