2023 оны наймдугаар сарын 5-6-нд шилжих шөнө иргэн А Баянгол дүүргийн 14 дүгээр хороонд замд зам тээврийн ослоор нас барсан харамсалтай хэрэг болсон. Тухайн үед эмч П.Батчулуун нь Эрүүл мэндийн хөгжлийн төвийн Эс, эд, эрхтэн шилжүүлэн суулгах үйл ажиллагааг зохицуулах албаны даргаар ажиллаж байсан бөгөөд ослын хохирогчийн ар гэрийнхнээс элэг, бөөр, түүний эргэн тойронд байгаа судсыг авах зөвшөөрлийг авсан байдаг. Гэтэл П.Батчулуун эмч хохирогч А-гийн биеэс

• шөрмөс, түүний бэхлэгдэх хэсэг буюу толгойн шөрмөсийг тойг яс, шаант ясны бэхдэгдэх хэсгийн хамт,
• саран жийргэвч шөрмөс semimembronosus шөрмөсийг шаант ясны дээд булуутай хамт,
• хоёр дунд чөмгөний доод булуу, archillis шөрмөс, peroneus longus шөрмөс, tibialis anterior шөрмөс зэрэг хүний доод мөчдийн эд,
• хүний эрхтэн болох цөсний хүүдий зэргийг зөвшөөрөлгүй авсан, тайлбарлан хэлээгүй, бодит байдлыг нуун дарагдуулж, хууран мэхэлж авсан хэрэгт яллагдагчаар татагдсан юм.

Ийнхүү Нийслэлийн эрүүгийн хэргийн анхан шатны шүүхээс анхан шатны шүүхийн шийдвэр буюу 2.6 жилийн хорих ялыг хэвээр үлдээж шийдвэрлэсэн билээ. 

Уг асуудалд Эрүүл мэндийн сайд Т.Мөнхсайхан байр сууриа илэрхийлжээ. 

Тэрээр "Эмч нар ажлаа хийж яваад ял шийтгүүлж буй тохиолдол нь зөвхөн П.Батчулуун эмчид тохиолдоод байгаа зүйл биш юм. Дэлхий дээр ажлаа хийсэн эмчид ял өгдөг улс маш цөөхөн байдгийн 1 нь Монгол болж байгаа нь харамсалтай. 2023, 2024 онуудад нийт 20-оод эмч шүүхээс ял шийтгэгдсэн нь хууль зүйн суурь өөрчлөлт хийх шаардлагатай байгааг харуулж байна. Миний хувьд Эмч, эрүүл мэндийн салбарын эрх зүйн байдлын тухай хуулийг санаачлан энэ хавартаа багтаад, Засгийн газарт танилцуулж, УИХ-д өргөн барина. 

П.Батчулуун эмчтэй би шүүхээр орохоос нь өмнө, бас дараа нь уулзсан. Шүүхээс гаргасан шийдвэрийг зөв, буруу гэж шүүх эрх байхгүй ч ажлаа хийж яваад, асуудалд өртсөн П.Батчулуун эмчийг хэрхэн эргээд ажлаа хийх боломжийг нь бүрдүүлэх вэ гэдгийг анхаарах учиртай. Хэрвээ П.Батчулуун эмч ял эдлэхэд хүрвэл тархины үхэлтэй донороос эд, эрхтэн шилжүүлэн авах мэс заслын үйл ажиллагаа үргэлжлэхэд хүндрэлтэй болно" гэлээ.