Төрийн орон сууцны корпорациас мэдэгдэл гаргажээ. Тус мэдэгдэлд Төрийн орон сууцны корпораци болон байгууллагын албан хаагч нарын нэрийг барьж, иргэдийг хохироож, залилах асуудал гарч байгааг сэрэмжлүүлжээ.

Тодруулбал, мэдэгдэлд "Төрийн орон сууцны корпораци" ТӨХХК нь Улаанбаатар хотын Хан-Уул дүүргийн 21 дүгээр хорооны нутаг дэвсгэрт хэрэгжүүлж буй "Солонго 1, 2" орон сууцны хоролол барих төсөл болон бусад төслүүд дээр ямар нэгэн бүртгэл, урьдчилгаа захиалга аваагүй болохыг иргэд та бүхэнд мэдэгдье гэжээ. 

Тус байгууллага аливаа бүртгэл хийх, орон сууцтай холбоотой мэдээлэл гаргахдаа албан ёсны цахим хуудсаараа гаргадаг бөгөөд мэдээлэл авахыг хүсвэл  7288-7788 дугаарын утсаар холбогдох эсхүл ажлын байранд биеэр очиж уулзах боломжтой аж.

Мөн цаашид компанийн нэр хүндэд халдсан, албан хаагчдын нэрийг барьсан, иргэдээс мөнгө төгрөг нэхэх, залилах үйлдлийг таслан зогсоож, хууль хяналтын байгууллагад тухай бүрд нь шалгуулах болно гэсэн байна.