УНТЭ-ийн Бөөр шилжүүлэн суулгах үндэсний баг болон донор хүлээж байгаа өвчтөнүүдийн төлөөлөл цаг үеийн асуудлаар мэдээлэл өглөө.

Г.Төмөр бөөрний дутагдалтай. Одоогоор кадавр буюу тархины үхжилттэй ч зүрх нь зогсоогүй донор хүлээлгийн жагсаалтын 4-р бүлгийн цустай иргэдээс 14-рт жагсаж байна.

Тэрээр  гемодиализ аппаратад ороод 7 жил болсон. Улмаар зүрх өвддөг, судасны лугшилт байнга тархинд цохилдог болсон талаараа танилцуулж, аппаратад ордог судсаа харууллаа. Мөн эм их уудгаас үүдэн ходоод нь муудсан гэв.

Түүнтэй адил донор хүлээж байгаа иргэд ирэх долоо хоногт уулзъя гээд салдаг ч эргэж ирдэггүй. Зүрх нь даахгүй ч юм уу шалтгаанаар нас барчихлаа гэдэг гэв.

Г.Төмөр: Долоон жилийн хугацаанд нүдэн дээр минь 6, 7 ийм тохиолдол гарлаа. Би адил нөхцөлд байдаг учир хэзээ ийм зүйл болох бол гэсэн айдастай л байна.

Уг нь эрхтэн шилжүүлэн суулгах хагалгаа ахицтай явж байсан бол миний урд жагсаж байгаа илүү хүнд нөхцөлтэй хүмүүс ядаж асуудлаа шийдчихсэн байх байсан болов уу. Гэтэл одоо нөхцөл байдал таг гацсан байдалтай байна. Энэ асуудлыг бүх шатанд анхаарч үзээсэй хэмээж байлаа.

Түүний бага хүү 5 настай ба бага насны хүүхдэдээ хэдэн жил амьд харагдах сан хэмээв.