Турк улсад лхагва гарагт явуулсан тусгай ажиллагааны үеэр 80 гаруй хүнийг авлига албан тушаалын гэмт хэрэг, террорист байгууллагуудыг санхүүжүүлж тусалсан хэмээн үзэж баривчилсан юм. Баривчлагдсан хүмүүсийн дунд Истанбул хотын захирагч Экрем Имамоглу, Бейликдузу хотын дарга Мурат Чалик, Сисли хотын дарга Ресул Эмрах Сахан байгаа бөгөөд тэднийг суллахыг шаардсан жагсаал үргэлжилж байна.

Тодруулбал ерөнхийлөгч Режеп Тайип Эрдоганы Засгийн газрын баривчилгааг эсэргүүцсэн иргэд Анкара болон Истанбул хотод жагсаалд нэгдэн хотын захиргааны гадаа цугласан юм. Энэхүү жагсаал нь ерөнхийлөгч Эрдоганы гол өрсөлдөгч болох Истанбул хотын захирагч Экрем Имамоглуг Ерөнхийлөгчийн сонгуульд намаа төлөөлөн өрсөлдөх эрхээ авч, нэр дэвшигчээр зарлагдахаас хэдхэн хоногийн өмнө ийнхүү баривчилсантай холбоотой. Имамоглу улс орныхоо ард иргэд болон шүүхийн салбарынханд хандаж өөрийнх нь намыг улс төрийн эргэлт хийхийг оролдсон гэж буруутгаж байгаа эрх баригчдын эсрэг тууштай зогсохыг уриалсан юм.

Жагсаалын үеэр хотод аюулгүй байдлыг хамгаалж, хэв журам сахиулахаар цэрэг цагдаагийнхан хамгаалалтад гарсан байна. Гэвч өнгөрсөн шөнө цагдаа нар жагсагчид руу нулимс асгаруулагч цацаж, резинэн сумтай буугаар галлажээ. Жагсагчид цагдаа нарын босгосон хамгаалалтыг нэвтлэхийг оролдсон гэж орон нутгийн хэвлэлүүд мэдээлсэн. Одоогоор жагсагчид болон цагдаа нарын мөргөлдөөний үеэр хүн гэмтэж бэртсэн эсэх нь тодорхойгүй байна.  Тус улсад олон нийтийн мэдээллийн хэрэгсэл, интернэтийн хандалтыг хатуу хязгаарласан хэвээр байна. Үүний хариуд жагсагчид хотын хаалт, их сургуулийн кампусуудад цугларч, уур бухимдлаа илэрхийлсээр байгаа юм.

Имамоглу баривчлагдсан тухай мэдээлэл цацагдсаны дараа Туркийн зах зээлүүд лхагва гарагт дэлхийн хэмжээнд хамгийн ихээр уналтад орж, лирийн ам.доллартай харьцах ханш хамгийн доод түвшиндээ хүрчээ. Бие даасан эдийн засагч, зөвлөх Арда Тунжа “Турк аль хэдийн уналтад орсон ч энэ бол улс төрийн уналт” гэж CNBC-д ярьсан байна. Мөн CNBC Туркийн Дотоод хэргийн яамтай холбогдож тайлбар авахад улс төрийн зорилготой баривчилгаа биш хэмээн хариулсан юм.