Шүүхээс "Ноорог"-ийн ажилтан А.О-г нэг сар цагдан хорих шийдвэр гаргасан билээ. Уг асуудалтай холбогдуулан А.О-ын ах А.Баяржавхлан мэдээлэл өгсөн. Тэрээр өөрийгөө онлайн мөрийтэй тоглоом зохион байгуулагч гэдгээ нуулгүй зарлаж, үйл ажиллагаагаа хэвийн явуулахын тулд ЦЕГ-ын Кибер гэмт хэрэгтэй тэмцэх газрын хоёр албан хаагчийн нэгэнд нь л гэхэд 75 сая төгрөгийн авлига өгдөг байсан гэв. Мөн цахим мөрийтэй тоглоомоос хамгийн их ашиг олдог хүмүүс нь зохион байгуулагчид биш хууль, хяналтын байгууллагынхан байдаг гэж тодотгосон юм.

Тэгвэл уг асуудлаар ЦЕГ-аас мэдээлэл хийлээ.

ЦЕГ-ын Кибер гэмт хэрэгтэй тэмцэх газрын дарга, дэд хурандаа С.Тайвангийн мэдээлснээр А.Баяржавхлангийн төрсөн хоёр дүү О, Б нар шүүгчийн захирамжаар цагдан хоригдсон. Уг асуудлаар мөрдөн шалгах ажиллагаа явуулж байгаа гэв. А.Баяржавхлан нь "Торгоны зам" хэмээх онлайн мөрийтэй тоглоомыг ажиллуулдаг. Тэдний бүлэглэл нь 18 хүнтэй бөгөөд гадаад улсаас цахим мөрийтэй тоглоом тоглуулдаг нь тогтоогджээ. Түүнийг мөрийтэй тоглоом зохион байгуулах, гэмт бүлэг үүсгэх, мөнгө угаах гэсэн 3 зүйл ангиар шалгаж байгаа гэж мэдээлэв. 

Түүнчлэн А.Баяржавхланг интерполоор эрэн сурвалжилж, Монгол Улсад албадан авчрах юм байна.

Мөн цагдаагийн алба хаагч авлига авдаг байсан гэх асуудалд ЦЕГ-ын дэд дарга Н.Мөнхзул "Иргэн А.Баяржавхлан мэдээлэл хийхдээ алба хаагчийн нэрийг тодорхой дурдаагүй. Тиймээс бид дотоод хяналт шалгалтыг эхлүүлсэн. Цагдаагийн байгууллагын хувьд хууль бус гэмт хэрэг хийсэн алба хаагчийн үйлдэлтэй эвлэрэхгүй. Хариуцлагыг нь тооцно. Харин тухайн алба хаагч буруутай гэж тогтоогдохгүй бол бид алба хаагчийнхаа хууль ёсны ашиг сонирхлыг хамгаална" гэлээ.