П.Батчулуун эмчид 2.6 жилийн хорих ял өгсөнтэй холбогдуулан эмч, эмнэлгийн ажилтнууд мэдээлэл хийсэн билээ. Тэгвэл тухайн үед амьгүй донор болж, элэг, бөөр, цөсөө өгсөн хүний ээж Д.Алтантуяа мэдээлэл хийлээ. Тэрээр сүүлийн үед олон нийтийн сүлжээгээр донор болсон охиных нь талаар сөрөг мэдээлэл гарч буй тул тухайн үед болсон зүйлсийг ярих нь зүйтэй гэж үзсэн байна. 

Иргэн Д.Алтантуяа: Миний охин эд эрхтэнээ өгч, олон хүний амийг аварсан нь буруу болчхов уу. Тухайн үед манай охинг осолд ороод сэрэхгүй гэхэд П.Батчулуун эмч уулзаж, элгийг нь хоёр бөөртэй нь өгөөч ээ гэхэд өдөржингөө эргэлзсэн. Миний охин үнэхээр босож ирэхгүй юм бол түмэнд буян болоод нэг айлын ч болтугай хүүхэд миний гурван зээ шиг битгий шаналаасай гэсэндээ охиноо донор болгосон. Гэтэл хоёр хөлийн ясыг явсан байсныг нь гаргахад нь мэдсэн. Элэг, бөөрийг нь авчхаад цогцсыг нь төмөр утсаар оёчихсон тийм байдалтай хүлээлгэж өгсөн. Хүний хамаг юмыг авчхаад аятайхан хүлээлгээд өгөхгүй, бараг л хүнээ аваарай гээд шидэх нь холгүй өгсөн гэсэн. Олон нийтийн сүлжээг харахаар үхсэн хүнээс хамаг юмыг нь аваад донор болгох хэрэгтэй шүү дээ гэсэн байна. Тэгж болдог юм уу. Хэн ч гэсэн хүнээ үхүүлчхээд, хамаг эрхтэнийг нь тонуулчхаад хоосон арьс хүлээж авахыг хэн ч хүсэхгүй. Ингэж хэлээд байгаа хүмүүс донор хэрэгтэй байгаа олон хүнд эд эрхтэнээ өгчхөөч гэж хэлмээр байна. Миний охин 10-аад хүнд буян болсон.

П.Батчулуун эмчээс би 100 төгрөг ч нэхээгүй. Биднийг мөнгө авчихсан юм биш үү гэх юм, тийм зүйл байхгүй гэлээ. Би хүний муу үзэх гээгүй. Элэг, бөөрийг нь ав гэсэн байхад яагаад нэмж авсан юм бэ гэдгийг л мэдмээр байна. Дараа нь надад нөхөн олговор гэж 2 сая төгрөг өгсөн. Нэг эрхтэн ч 2 сая төгрөг хүрэхгүй шүү дээ. Гэхдээ би мөнгө нэхээгүй гэдгийг хэлмээр байна. Хамгийн гол нь шөрмөс авна гэж хэлээгүй. Тухайн үед шөрмөс авна гэсэн бол өгөхгүй гэх байсан. Элгийг цөстэй нь хамт авдаг ч гэж хэлээгүй гэлээ.