Өмнөд Солонгост өнгөрсөн бямба гарагт гарсан ойн түймрийн улмаас 4 хүн нас барж, олон хүнийг нүүлгэн шилжүүлжээ. Тус улсын зүүн өмнөд хэсэгт орших Санчонг мужид хоёр гал сөнөөгч нас барсан байдалтай олдсон тухай Ёнхап агентлаг орон нутгийн албаныхнаас иш татан мэдээлсэн. Үүний дараа мөн нэг төрийн алба хаагч, гал сөнөөгч нас баржээ. Мөн зургаан хүн ойн түймэрт өртөж түлэгдсэн байна. 

Орон нутгийн цагаар 18:00 цагт (GMT 09:00) улсын хэмжээнд гамшгийн байдал зарлаж, гал түймэр Улсан хот болон зүүн өмнөд хэсгийн хойд болон өмнөд Кёнсан мужуудыг хамарсан юм. Нийслэл Сөүл хотоос 250 км орчим зайтай Өмнөд Кёнсан мужийн Санчон хотын нутаг дэвсгэр түймэрт хамгийн их байна. 

15 тосгоны иргэдийг нүүлгэн шилжүүлэхээр болж, 300 гаруй алба хаагч болон 20 гаруй нисдэг тэрэг тус хотын нутаг дэвсгэрт түймрийг унтраахаар ажиллаж байгаа тухай тус улсын Дотоод хэргийн яамны мэдээллээд байна. Түймэр иргэдийн суурьшлын бүсэд нэвтэрч барилга байгууламж, сүм дуганыг шатаажээ. 

Өмнөд Солонгосын төрийн тэргүүний үүргийг түр хугацаанд гүйцэтгэж байгаа Эдийн засаг, Сангийн айд Чой Сан Мок өчигдөр гамшигтай хэрхэн тэмцэж байгаа тайлан мэдээллийг өглөө. Түүний хэлснээр 9,000 төрийн алба хаагч түймрийг унтраах ажилд томилогдсон байна. Мөн 105 нисдэг тэрэгний тусламжтайгаар ойн түймэртэй тэмцэж байгаа аж. 

Түймэр асаж буй бүсэд цаг агаар хуурай, салхитай байгаа нь гал сөнөөгчдөд бэрхшээл учруулж байгаа юм байна.