АНУ-ын Ерөнхийлөгч Дональд Трампын Засгийн газар АНУ дахь Куба, Хаити, Никарагуа, Венесуэлээс ирсэн 530,000 цагаачийн хууль ёсны статусыг цуцлахаар болжээ.

Нэгдүгээр сард Дотоодын аюулгүй байдлын яам "АНУ-д түр хугацаагаар ажиллаж, амьдрахыг зөвшөөрсөн хөтөлбөр"-үүдийг үе шаттайгаар зогсооно гэдгээ мэдэгдэж байсан юм. Мөн “Өмнөх Ерөнхийлөгч Байден Засгийн газар хүмүүнлэгийн үүднээс түр оршин суух зөвшөөрөл олгох хөтөлбөрийг урвуулан ашиглаж, 1.5 сая цагаачийг манай улсад хавтгайруулан нэвтрүүлсэн. Энэ бүхнийг Трампын Засгийн газар үүрэгт ажилдаа орсон эхний өдрөө зогсоосон. Цагаачдыг нэг бүрчлэн шалган нэвтрүүлнэ” гэж тус мэдэгдэлд дурдсан байна.

Өмнөх ерөнхийлөгчийн үед хэрэгжиж байсан түр оршин суух зөвшөөрөл олгох хөтөлбөрт хамрагдсан цагаачид дөрөвдүгээр сарын 24 гэхэд Америкаас явсан байх ёстой юм.

Америкийн зарим иргэн, цагаач хүмүүнлэгийн хөтөлбөрийг зогсоосон гэж Трампын Засгийн газрыг шүүхэд өгч, дөрвөн үндэстний хөтөлбөрийг сэргээх хүсэлтэй байгаа аж. 

Трамп албан тушаалдаа очсоноосоо хойш хуулийн хэрэгжилтийг эрчимжүүлэх арга хэмжээ авч, тэр дундаа АНУ-д албан ёсны бичиг баримтгүй оршин суудаг олон тооны хүмүүсийг албадан гаргахаа мэдэгдсэн. Энэхүү шийдвэр нь дөрөвдүгээр сарын 24 гэхэд АНУ-аас гараагүй цагаачдад хамаатай юм. 

Цагаачдын эрхийн "Justice Action Center"-ийн захирал Карен Тумлин хэлэхдээ, Трампын Засгийн газар АНУ дахь олон зуун мянган цагаачид болон тэдний ивээн тэтгэгчдийн өмнө холбооны засгийн газраас өгсөн амлалтаа зөрчиж байна хэмээн мэдэгдсэн. Мөн тэрээр AFP агентлагт өгсөн мэдэгдэлдээ "Хүмүүнлэгийн тусламжаар цагаачилж буй Куба, Хаити, Никарагуа, Венесуэл улсын хүмүүсийн хууль ёсны статусыг гэнэт цуцалсан нь улс орон даяар гэр бүл, олон нийтийн хувьд шаардлагагүй эмх замбараагүй байдал, зүрх сэтгэлийн шарх үүсгэх болно" гэж мэдэгджээ.

Харин үүний хариуд Венесуэл улс АНУ-аас ирсэн цагаачдыг эх оронд нь буцаах нислэгийг сэргээхээр болжээ. Тус улсын Засгийн газрын мэдэгдэлд “Цаашид цагаачлах нь гэмт хэрэг биш бөгөөд буцаж ирэхийг хүссэн хүн бүр буцаж ирж болно” гэжээ.