АНУ-д үйлдвэрлээгүй бүх авто машинд 25 хувийн татвар ногдуулна гэж Ерөнхийлөгч Дональд Трамп лхагва гарагт мэдэгджээ. Тэрбээр мөн АНУ-д үйлдвэрлэсэн авто машинд ямар ч татвар ногдуулахгүй гэдгийг дурдсан байна. Тэрээр ийнхүү бүтээгдэхүүний татварыг нэмснээр хөрш орнууд төдийгүй эдийн засаг худалдааны холбоо харилцаатай улс орнуудтай худалдааны болон татварын дайн эхлүүлээд байна. 

Татвар ногдуулах шийдвэр дөрөвдүгээр сарын 2-ноос хэрэгжиж эхлэх бөгөөд “бид дөрөвдүгээр сарын 3-наас татварыг хурааж эхэлнэ” гэж тэрбээр хэлсэн юм.  Харин машины эд ангиудад ногдуулсан татварыг нэмсэн шийдвэр нь тавдугаар сараас хэрэгжинэ. 

Европын Комиссын Ерөнхийлөгч Урсула фон дер Ляйен шинээр ногдуулж буй тарифыг шүүмжилж, Европын Холбоо “эдийн засгийн ашиг сонирхлоо хамгаалахын зэрэгцээ яриа хэлэлцээ хийх замаар шийдлийг эрэлхийлэх болно” гэж мэдэгдсэн байна.

Мөн энэхүү шийдвэртэй холбогдуулж Японы Ерөнхий сайд Шигерү Ишиба байр сууриа илэрхийлжээ. Тэрбээр хэлэхдээ "Бид АНУ-д хөрөнгө оруулалтаар нэгдүгээрт бичигддэг. Трампын шийдвэрийн хариуд зохих арга хэмжээг мэдээж авна. Бид бүх хувилбарыг авч үзэх болно" гэж мэдэгдсэн байна. 

Тарифын нэмэгдлээс болж дэлхийн хамгийн их борлуулалттай автомашин үйлдвэрлэгч Тоёотагийн хувьцааны ханш 3.5 хувиар буурсан бол Ниссан 2.5%, Хонда 3.1%, Mitsubishi Motors 4.5%, Mazda 5.9%, Subaru 6.1%-иар тус тус буурсан байна. Мөн Өмнөд Солонгост Hyundai компанийн хувьцаа 2.7 хувиар унасан байна.