УИХ-ын байнгын хороодын хамтарсан хурлаар Монгол Улсыг 2021-2025 онд хөгжүүлэх таван жилийн үндсэн чиглэлийн 2024 оны биелэлт, Монгол Улсын Засгийн газрын 2024-2028 оны үйл ажиллагааны хөтөлбөрийн 2024 оны хэрэгжилт, Монгол Улсын хөгжлийн 2024 оны төлөвлөгөөний гүйцэтгэлийн тайланг хэлэлцсэн. Энэ үеэр УИХ-ын гишүүн Б.Мөнхсоёл манай улс хүнээ хөгжүүлэх тал дээр дутагдалтай ажиллаж байгааг шүүмжиллээ. 

Тэрээр "Үйл ажиллагааны хөтөлбөр нь 8 гол чиглэлтэй. Үүний нэг нь хүний хөгжлийн үзүүлэлтийг сайжруулах юм байна. Гэвч энэ үзүүлэлт 0 хувьтай байна. Өөрөөр хэлбэл, хүний хөгжлийн үзүүлэлтийг сайжруулах, агаарын бохирдлыг бууруулах, түгжрэлийг сааруулах гэсэн зорилт 0 хувьтай байна гээд дүгнэжээ. Үүнийг би үнэн гэж бодож байна. Монгол Улс хөгжихийн тулд хүндээ анхаарч, цементээ багасгая гэж мянга ярьчхаад үр дүн нь 0 байна, анхаарах цаг нь болжээ. Энэ үнэлгээг яах гэж хийдэг юм бэ. Зорилго байх ёстой. Гэтэл зорилгогүй нэг юм хийчхээд тэрийгээ танилцуулах ёстой гэж танилцуулаад, гишүүд хэдэн асуулт асуусан болоод та бүхэн хариулсан болоод сууж байгаа нь нэг ёсны жүжиглэлт болоод байна" гэлээ.