Иргэн Р.Шинэгэрэл D-Parliament системд "Хувь хүний орлогын албан татвар 10 хувь байгааг 1 хувь болгон бууруулах" нийтийн өргөдлийг санаачилсан. Өргөдөлд 100 мянган хүн гарын үсэг зурж, нэгдсэнээр УИХ-аас ажлын хэсэг томилогдож, уг асуудлыг УИХ-ын түвшинд хэлэлцэх боломж бүрдлээ. 

D-Parliament системд олон нийтийн өргөдөл санаачлагддаг ч ажил хэрэг болсон нь тийм ч их биш. Хамгийн анхны 100 мянган гарын үсэг цуглуулсан өргөдөл бол "Газрыг гадаадын иргэн 100 жилээр ашиглах, эзэмших эрхийг цуцлах" тухай юм. Уг өргөдлийг Г.Занданшатар УИХ-ын дарга байхдаа өөрөө барьж явсаар ажил хэрэг болгож байсан. Тодруулбал, Хөрөнгө оруулалтын тухай хуульд өөрчлөлт оруулах замаар гадаадын иргэн, аж ахуйн нэгжид газрыг эзэмшүүлдэггүй болж, 100 жил гэх хугацааг байхгүй болгосон байдаг. 

Энэхүү үйл явдлаас хойш Нийгмийн даатгалын шимтгэлийг бууруулах, "Цалинтай ээж" хөтөлбөрийн мөнгийг нэмэгдүүлэх зэрэг өргөдлүүдийг иргэд санаачилж, 100 мянган гарын үсэг хүргэж байсан ч зарим шаардлагыг хангаагүй гэж үзээд өргөдөл УИХ руу очоогүй байдаг.

Тэгвэл хэдхэн хоногийн дотор 100 мянган гарын үсэг цуглуулсан "Хувь хүний орлогын албан татвар 10 хувь байгааг 1 хувь болгон бууруулах" өргөдлийг хэн гэдэг УИХ-ын гишүүн барьж авч, УИХ руу зүтгүүлж хэлэлцүүлэх нь тодорхойгүй байна. Нийтийн өргөдлийн гарын үсэг хэдхэн хоногийн дотор цугларсан нь тэр хэмжээгээр иргэдийн дунд ХХОАТ-ыг тодорхой хэмжээнд бууруулах хэрэгцээ шаардлага үүссэнийг харуулж буй билээ.

Одоогийн байдлаар татвар, шимтгэл бууруулах асуудлыг Засгийн газар ярьж буй бөгөөд удахгүй өргөн барих Татварын багц хуулийн шинэчлэл нь хувь хүнд гэхээс илүү ААН-үүд рүү чиглэснийг эдийн засагч нар хэлж байна.