2025 оны 3-р сарын 31-нд SpaceX компани Falcon 9 пуужинг ашиглан Crew Dragon хөлгийг амжилттай хөөргөлөө. Уг нислэг нь хувийн сансрын нислэг бөгөөд Fram 2 хэмээн нэрлэгдсэн билээ.

Тодруулбал, даваа гарагт аянга цахилгаантай борооны үеэр анх удаа Falcon 9 пуужин түүхэн даалгавар гүйцэтгэхээр туйлын тойрог замд чиглэсэн юм. Америкийн “SpaceX” компани түүхэндээ анх удаа дэлхийн туйлуудын дээгүүрх орон зайд сансрын нислэг үйлдэж буй нь энэ. Тэдний хөөргөсөн“Crew Dragon” хөлөгт 4 хүн нисэж байна.

Энэхүү нислэг нь криптовалютын бизнес эрхлэгч Чун Вангийн удирдлага дор хэрэгжиж буй бөгөөд багийн бүрэлдэхүүнд:

• Чун Ван-Энтрепренер, нислэгийн санхүүжүүлэгч, 
• Яннике Миккелсен-Норвегийн кино найруулагч, 
• Рабеа Рогге-Германы роботын судлаач, 
• Эрик Филлипс-Австралийн аялагч нар багтсан. Тэд бүгд сансрын нисгэгч биш юм. 

Нислэг 3-5 хоног үргэлжлэх бөгөөд энэ хугацаанд багийн гишүүд сансарт анх удаа рентген зураг авах, цус багадалт, ясны эрүүл мэндийг судлах, мөн мөөг ургуулах туршилт болон булчин, ясны массын алдагдлаас сэргийлэх зорилгоор цусны урсгалыг хязгаарлах зэрэг 22 туршилт хийхээр төлөвлөсөн байна.  

Энэхүү нислэг нь дэлхийн туйлуудыг дамжин өнгөрөх анхны хүнтэй сансрын нислэг болж байгаа бөгөөд Fram 2 нислэг нь сансрын аялал, судалгааны чиглэлээр шинэ боломжуудыг нээж, ирээдүйн хувийн сансрын нислэгүүдийн хөгжилд чухал хувь нэмэр оруулна гэж үзэж байна.