Эдийн засгийн байнгын хороо хуралдаж байна. Хурлын тов ёсоор Зөвшөөрлийн тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүдийг УИХ-ын чуулганаар хэлэлцэхийг дэмжлээ.

Засгийн газрын хэрэг эрхлэх газрын дарна Н.Учрал “Энэ хуулийг боловсруулахдаа эрүүгийн хулийн санкцыг нь нэмэгдүүлэх бодлого баримталсан. Ингэхдээ нийгэм, эдийн засгийн хор аюулыг харгалздаг.

1 жилд 500 сая доллар гадагшаа урссан. Энэ хуулийг боловсруулж эхэлсэн цагаас хойш 50 сая доллар гадагшаа урсчихаад байна. 1, 2 сард 87 сая ам доллар зөвхөн цахим мөрийтэй тоглоом, бооцоот тоглоомоор гадагшаа явчихсан” хэмээж байв.

УИХ-ын гишүүн Л.Соронзонболд “Сугалаатай холбоотой асуудал адил хор уршигтай. Үүнийг судалж үзсэн үү” хэмээн асуухад “Эд мөнгөний хонжворт сугалаагаар гадагшаа валют урсгаад байгаа зүйл байхгүй. Дотооддоо л байдаг юм байна гэдэг утгаар нь энэ хуулийн төсөлд оруулаагүй. Гэхдээ УИХ ажлын хэсэг байгуулаад, хонжворт сугалааг хориглоё гэвэл Засгийн газар татгалзах зүйл байхгүй” гэв.

Түүнчлэн тус хуулийн төсөлд ашиг олох зорилгоор цахим сүлжээ ашиглан мөрийтэй тоглоом зохион байгуулах, үйл ажиллагаа эрхлэх, дэмжлэг үзүүлэх гээд бүх үйлдлийг нь хориглосон байна. Батлагдвал эрсдэлийг 65 хувиар бууруулна хэмээн тооцоолжээ.

Харин УИХ-ын гишүүн Г.Уянгахишиг “Зөвшөөрлийн тухай хуульд хориглох заалт оруулж болохгүй. Аливаа хориглосон үйлдэлд Эрүүгийн хуулиар ял шийтгэл оногдуулах бол бие даасан хуультай байх ёстой” хэмээж байв.

Гэсэн ч тус хуулийн төслийг УИХ-ын чуулганаар хэлэлцэхээр боллоо.