Иргэн “А”-ийн эзэмшлийн газрыг НИТХ-ын 2023 оны 09 дүгээр сарын 26-ны 112 дугаар тогтоолоор байгалийн нөөц газрын ангиллаар орон нутгийн тусгай хэрэгцээнд авчээ.

Тус газар нь Баянгол дүүргийн 20 дугаар хороо, ТЭЦ-4 станцын зүүн талд, үйлдвэрлэлийн баруун бүсэд байрлах 953 мкв газар. Үүнийг тус дүүргийн Засаг даргын 2004 оны 09 дүгээр сарын 30-ны 275 дугаар захирамжаар “хүнсний ногоо тарих” зориулалтаар иргэн “Б”-д олгосон аж. “Б”-ээс “А” 2013 онд шилжүүлэн авч, 5х6 хэмжээтэй байшин барьж, хашаалсан байна.

Харин НИТХ-ын шийдвэрээр хил зааг солбицлыг тогтоосны дотор “Б”-ийн эзэмшиж байсан газар бүхэлдээ хамрагдсан.

Улмаар Баянгол дүүргийн Засаг даргын 2024 оны 03 дугаар сарын 11-ний өдрийн А/121 дүгээр захирамжаар иргэний газар эзэмших эрхийг цуцалжээ.

“А”-ийн зүгээс тус шийдвэрийг хүчингүй болгуулахаар шүүхэд хандсан байна. Эцсийн шийдвэрийг Дээд шүүх энэ сарын 10-нд тогтоожээ.

Үүнд “усан сан бүхий газрын онцгой хамгаалалтын бүс, үерийн далангийн хамгаалалтын бүс, цахилгаан шугамын хамгаалалтын бүстэй давхцалтай” гэх үйл баримт бүрэн тогтоогдоогүй,  маргаан бүхий газрын хаана нь усны онцгой хамгаалалтын бүс, цахилгаан шугам,  үерийн далангийн хамгаалалт байрлаж байгаа болох, давхцал нь хэдий хэмжээний газраар давхцал үүссэн болох нь тодорхойгүй байна.

Иймд анхнаасаа газар олгох шийдвэр нь хууль бус эсэхийг тодорхойлох шаардлагатай. Тийм бол иргэнд нөхөн олговор олгох, эсвэл газрыг солих зэрэг арга хэмжээ авах зарчимтай талаар дурджээ.

Мөн иргэний газрын аль хэсэг нь онцгой хамгаалалтын бүсэд орохыг тодорхойлж, шаардлагагүй хэсгийг иргэний өмчлөлд үлдээхийг даалгасан.

Энэ нь захиргааны байгууллага нийтийн эрх ашгийг хамгаалах зорилгодоо хүрэх аргаа зөв сонгох, иргэний эрхийг хамгийн багаар хөндөх зарчим болохыг сануулсан байна.

Ийнхүү иргэний газрын эрхийг цуцалсан Засаг даргын шийдвэрийг 6 сараас хүчингүй болгож, энэ хугацаанд дээрх байдлаар нөхцөл байдлыг тодруулахыг даалгажээ.

Шүүхийн шийдвэрийг харах бол энд дарна уу.