2021 онд Хотын дарга асан Д.Сумъяабазар Туул голын эрэг дагуу газар авсан зарим иргэн, аж ахуйн нэгжийн газар эзэмших эрхийг хүчингүй болгосон. Тодруулбал, Хан-Уул дүүргийн 17 дугаар хороо буюу “Хан хиллс” хотхоноос баруун тийш Туул голын эрэг дагуу газар авч, барилга барих нэрээр Туул голын бургасанд аюул учруулж буй 22 аж ахуйн нэгж байв. Дээрх 22 аж ахуйн нэгжээс 19 нь ямар нэг барилга байгууламж бариагүй байсан тул дээрх 19 газар эзэмшигчийн газар эзэмших, ашиглах эрхийг хүчингүй болгосон. 

Ийнхүү Зайсангийн гүүрнээс “Хан хиллс” хотхон хүртэл автомашины 10.5 метрийн өргөнтэй, хоёр эгнээ бүхий урсгалтай, хоёр талаараа 1.5 м өргөн дугуйн замтай, явган хүний зорчих хэсэгтэй нэг км хатуу хучилттай зам тавьсан билээ. 

Гэтэл “Нутгийн шийдэл” ТББ-ын үүсгэн байгуулагч Ц.Оюунгэрэл уг ажлыг “Туул голын үерийн даланг нурааж, үерийн эрсдэлтэй нөхцөл үүсгэж байна” хэмээн 2021 оны 11 сард шүүхэд өргөдөл гаргахаа мэдэгдэж байв.

Тэгвэл 3.6 жил үргэлжилсэн шүүхийн маргааны эхний шийдвэр гарч, Нийслэлийн Засаг даргад “даланг сэргээн бэхжүүл” гэх үүрэг өгч шийдвэрлэсэн талаар Ц.Оюунгэрэл цахим хуудаснаа мэдээлжээ. 

Тэрбээр “Далангаар хамгаалуулж амьдардаг Хан-Уул дүүргийн 15, 17, 18 дугаар хорооны иргэдийн аюулгүй байдлыг хамгаалахаар шүүхийн шийдвэр гарлаа. Шүүхийн шийдвэр гар дээр цаасан хэлбэрээр ирэх үед нэг бүрчлэн уншиж танилцуулж өгнө. Мөн Нийслэлийн Засаг даргад “үерийн хамгаалалтын даланг заавал бэхжүүл” гэх шүүхийн шийдвэр очно. Үүний дагуу Засаг дарга төсөвтөө тусгаж, нийслэл энэ ажлыг заавал хийх ёстой болно. “Энэ ажлыг хийхгүй, үерийн хамгаалалтын даланг бэхжүүлэхгүй” гэж давж заалдах хэмжээний улайм цайм юм гарахгүй байх гэж бодож байна” гэсэг юм.