ЗГХЭГ-ын дарга, Үндэсний баялгийн сангийн тухай хуулийг хэрэгжүүлэх ажлын хэсгийн ахлагч Н.Учрал Ерөнхийлөгч асан Х.Баттулгатай холбоотой Төгрөг нуурын ордын асуудлыг хөндсөн. Тэгвэл тэрээр өнөөдөр Засгийн газрын мэдээлэл өгөх цагаар Ерөнхийлөгч асан УИХ-ын гишүүн Х.Баттулгад долоо хоногийн хугацаа өгч байгааг мэдээллээ.

ЗГХЭГ-ын дарга Н.Учрал: Төрийн тэргүүнээр ажиллаж байсан УИХ-ын гишүүн Х.Баттулга гуайд хандаж хэлье. Та бол стратегийн ордоор бүртгэх боломжтой 39 ордын нэг болох Төгрөг нуурын ордыг зарсан чинь үнэн. Зарахдаа Виржиниа аралд болон Сингапур, Хонконгод бүртгэлтэй гурван компаниар дамжуулж үндэстэн дамнасан санхүүгийн схем хийж, 250 сая доллараар зарсан нь үнэн. Мөн байгалийн баялгийг иргэддээ өгье гэж ярьж яваа чинь үнэн. Таныг өөрийн хутгасан энэ асуудлыг нэг талд гаргаж, энэ олон компаниудтайгаа учраа олох долоо хоногийн хугацаа өгье. Үгүй бол Засгийн газар хуулийн хүрээнд дараагийн арга хэмжээг авна" гэлээ.