Засгийн газрын ээлжит хуралдааны мэдээллийг танилцууллаа.

Энэ үеэр Сангийн сайд Б.Жавхлан валютын нөөц 5 тэрбум долларт хүрсэн хэмээн мэдэгдэв.

Өмнө нь 2022 оны 11 сард болон өнгөрсөн оны жилийн эцсээр ийм дүнд хүрч байсан аж. Цаашид энэ нөөцөө тогтвортой барих чиглэлээр ажиллан хэмээлээ. Ийнхүү нэмэгдэхэд гаднын зээл тусламж аваагүй ба экспорт нэмэгдүүлэх, санхүүгийн зах зээл дэх нөөц нэмэгдүүлэх гэсэн хоёр арга ашигласан аж.

Тухайлбал, нүүрсний экспорт цохилт авсан ч зэсийн хувьд биет хэмжээний экспорт 40 хувь нэмэгдэж, татварт төвлөрүүлэх орлого мөн нэмэгдсэн нь алдагдлаа нөхсөн явдал.

Түүнчлэн ирэх II улирал бол эдийн засгийн идэвхжилийн үе ба Засгийн газрын хөрөнгө оруулалтад анхаарч ажиллана.

Гаднын хөрөнгө оруулалтын хувьд Монгол Улсын татварын орчныг сайжруулах, гадаадын хөрөнгө оруулагчидтай харилцах харилцааг тодорхой болгох шаардлагатайг харуулсан жишээ бол Оюутолгой, Петрочайнагийн маргаан.

Тус бүр 300-аас тэрбум долларын татварын маргаантай эдгээр компанийн асуудал татварын хуулийн шинэчлэл, гаднын хөрөнгө оруулалтын орчинг сайжруулах бодлогын хүрээнд шийдэгдэх эсэхийг сэтгүүлч тодрууллаа.

Үүнд Б.Жавхлан “Нэгэнт үүссэн маргаанаас буцах боломжгүй. Цаашдаа дараа, дараагийн хөрөнгө оруулалт татахдаа дээрх асуудлыг анхаараад явах болно” хэмээн хариулав.

Мөн “Засгийн газар одоохондоо Монгол банкны 2 тэрбум доллар буюу 7.4 их наяд төгрөгийн алдагдлыг нөхөх боломжгүй. Гэхдээ хуульд тийм зохицуулалт байдаг. Цаашдаа чадамжтай болбол хуулийн дагуу үнэт цаасны нөөцөөр нөхнө. Энд төв банкны зардал нь бодлогын болон үйл ажиллагааны гэсэн 2 янз байдгийг анхаарах хэрэгтэй. Бодлогын хүүг бууруулсантай холбоотой зардал бол бодлогын зардал” хэмээн мэдэгдлээ.