Ерөнхийлөгч Дональд Трамп лхагва гарагт TikTok-ийн хувьцааг худалдаж авахболомжтой хөрөнгө оруулагчдын талаар зөвлөлдөх уулзалт хийх юм байна. Ням гарагт Дональд Трамп сэтгүүлчдэд “ТикТок үйл ажиллагаагаа үргэлжлүүлэхийг хүсэж байна” хэмээн ярьсан юм. 

Лхагва гарагт Трамптай хийх уулзалтад Дэд ерөнхийлөгч Ж.Д.Вэнс, Худалдааны нарийн бичгийн дарга Ховард Лутник, Цагаан ордны үндэсний аюулгүй байдлын зөвлөх Майк Вальц, Үндэсний тагнуулын газрын захирал Тулси Габбард нар оролцох магадлалтай байна.

“TikTok”-ийг худалдаж авах сонирхлоо “Oracle”, “Blackstone” зэрэг хөрөнгө оруулалтын томоохон компани илэрхийлсэн бөгөөд тэднээс гадна хэд хэдэн санал ч иржээ. Тухайлбал, тэрбумтан Фрэнк МакКуртын удирдсан бүлэг “ByteDance”-д 20 тэрбум ам.долларын санал тавьсан бол “Roblox”-ийн гүйцэтгэх захирлыг багтаасан өөр нэгэн хөрөнгө оруулалтын бүлэг 30 тэрбум ам.долларыг санал болгосон байна. Мөн хиймэл оюуны стартап “Perplexity AI”, технологийн аварга “Microsoft” компани ч энэхүү хэлцэлд оролцох сонирхлоо илэрхийлжээ.

Хэрэв дөрөвдүгээр сарын 5-наас өмнө хэлцэл хийгдэхгүй бол “TikTok”-ийг хориглох хууль хүчин төгөлдөр болох юм. Харин Трамп шаардлагатай гэж үзвэл уг хугацааг дахин сунгах боломжтой гэдгийг мэдэгдээд байна.