1998 онд найруулагч Б.Бадар-Ууганы бүтээж байсан “Шинэ үсгийн багш” МУСК-ны гол дүрд тоглосон Бунтарын Гарьд жүжигчин бамбайн хорт хавдраар оношлогджээ. 

Түүний хувьд уг оношоо өнгөрсөн 2024 оны зургаадугаар сард сонссон бөгөөд наймдугаар сард нь ХСҮТ-д хагалгаанд орсон аж. Эхний хагалгаа амжилттай болсон ч хавдар нь дахин сэдэрч, хоёр дахь хагалгаанд орох шаардлагатай болжээ. 

Тус хавдар нь “medullary carsinoma” гэх бамбайн хорт хавдрын 6-8 хувьд нь тохиолддог, С эсийн мутацид орсон ховор төрлийн хавдар болох нь тогтоогдож БНСУ-ыг зориод байгаа аж. Хоёр дахь хагалгаандаа орохоор өнгөрсөн 6 сарын турш БНСУ-ын Ханян Их сургуулийн эмнэлэгт үзүүлж, хяналтад орсон бөгөөд тус хавдарт эм, эмийн эмчилгээ, хими, цацрагийн эмчилгээ тохирохгүй, зөвхөн хагалгаагаар эмчилдэг бөгөөд ар гэрийнх нь зүгээс санхүүгийн хүндрэлтэй тулгарчээ. 

Ийнхүү жүжигчин Б.Гарьдын эхнэр Ц.Үүрцайх цахим хаягтаа “Нэг л удаа бидэнд туслаач” хэмээн хандивын пост нийтэлжээ. 

Жүжигчин Б.Гарьдын аав Ж.Бунтар нь Монголын кино урлагийн нэрт найруулагч МУУГЗ бөгөөд “Ирж яваа цаг, “Гарьд магнай”, “Тод магнай”, “Цэц магнай”, “Гэрлэж амжаагүй явна” бүтээлийг найруулсан эрхэм юм. 

Хандивын данс: 1909206749 /Голомт банк/ Бунтар ГАРЬД