Онцгой байдлын ерөнхий газарт 2025 оны дөрөвдүгээр сарын 2-ны өдөр гал түймрийн томоохон 12 дуудлага мэдээлэл бүртгэгдэж, алба хаагчид газар дээр нь ажиллажээ. Дуудлага мэдээллийн дийлэнх нь шар өвс шатсан, түүнээс үүдэлтэй хашаа, байшин, автомашин шатсан дуудлагууд байсан юм.

Түүнчлэн Хөвсгөл аймгийн Эрдэнэбулган суманд ой хээрийн түймэр гарсныг унтраахаар ажиллаж байна.

Тодруулбал, Хөвсгөл аймгийн Эрдэнэбулган сумын 2 дугаар баг "Асаат нарийн" гэдэг газар /аймгийн төвөөс зүүн хойд зүгт 240 км, сумын төвөөс зүүн урд зүгт 12 км-т/ ой, хээрийн түймэр гарч байна гэсэн дуудлагыг дөрөвдүгээр сарын 2-ны 19:17 цагт хүлээн авсан. Хөвсгөл аймгийн Онцгой байдлын газрын Тариалан сум дахь 46 дугаар ангийн алба хаагчид, Эрдэнэбулган сумын Мэргэжлийн анги болон орон нутгийн иргэд түймрийг унтраахаар ажиллаж байна.