Монголын Хөлбөмбөгийн холбооны үйл ажиллагааны талаар Холбооны нарийн бичгийн дарга М.Ганбаатараас тодрууллаа. 

-Хөлбөмбөгийн холбоонд аудит орж байгаа юу?

-Олон улсын хөлбөмбөгийн холбооноос шалгалт орсон. Шалгагдаж байгаа, аудитор томилогдсон.

-Одоо нэлээн том хэмжээний гадаадын төсөл авчихсан юм билээ. Тэрийг хэрэгжүүлэх тал дээр хэрхэн ажиллаж байна вэ?

-Олон улсын Хөлбөмбөгийн холбооны шалгалт орсонтой холбогдуулан төсөл, хөтөлбөрийн санхүүжилтүүд зогссон байгаа. 

-Хөлбөмбөгийн холбоо үеийн үед асуудалтай байна. Дараагийн ерөнхийлөгчөөр ямархуу хүн байгаасай гэж бодож байна вэ?

-Энэ сарын 28-нд холбооны Ерөнхийлөгчийн сонгууль болно. Сонгуульд 6 хүн нэр дэвшиж байна. Үүнд, УИХ-ын гишүүн асан Ц.Анандбазар, Жет скүүтерийн Г.Дашням, Монголын Хөлбөмбөгийн холбооны техникийн хэлтсийн дарга хийж байсан С.Жаргал, онголын Хөлбөмбөгийн холбооны техникийн хэлтсийн дарга Б.Гарьдмагнай, Ховд клубийн эзэн Ө.Алтай, Хоромхон клубийн Н.Болор-Эрдэнэ. Ерөнхийлөгчийн сонгуульд Олон улсын хөлбөмбөгийн холбооны жишгийн дагуу болдог. 

-Хөлбөмбөгийн холбооны талбай хувийн хэвшилд шилжсэн асуудал байна?

-Өөр байгууллагад шилжээгүй. Холбооны бүртгэл дээр байгаа. И-Монголиагаас харахад гараад ирнэ.

-Танай холбоо хаанаас ямар ямар санхүүжилт авдаг вэ?

-Олон улсын хөлбөмбөгийн холбоо, Азийн хөлбөмбөгийн холбооноос санхүүжилт авдаг. Дотоод үйл ажиллагаа, цалин гэх мэт урсгал зардлыг авдаг. Мөн форвард гээд төсөл бий. Энэ төслөөр Төв цэнгэлдэхийн хажуугийн стадионыг байгуулсан. Түүнчлэн Яармаг, Төв аймагт байгуулсан талбай зэргээр хөрөнгө оруулалт тал дээр чиглэсэн санхүүжилт юм. 

-Нийт санхүүжилт хэд байдаг вэ?

-Олон улсын хөлбөмбөгийн холбооноос 950 мянган ам.доллар төсөвлөсөн ч одоо аудит орж байгаа болохоор түр зогсоосон байгаа. Бусад санхүүжилтийг 4-р сарын аудитын дараа батална.