УИХ-ын гишүүн Дав.Цогтбаатар "Хөгжлийн банкны" гэх хэрэгтэй холбоотойгоор нийтийн албанд томилогдох эрхээ 2 жил хасуулж, 20 сая төгрөгөөр торгуулах ял шийтгүүлсэн.

Тэрээр гуравдугаар сарын 10-нд УДШ-ийн Эрүүгийн хэргийн танхимын тэргүүн Ч.Хосбаярт шүүхээр оногдуулсан ялыг УИХ-ийн гишүүнээр ажилласны дараа эдлүүлэхээр хойшлуулах боломжтой эсэх болон "Хөгжлийн банкны" гэх хэргийн тус гишүүнд холбогдох хэсгийг дахин судалж, хэлэлцүүлэх талаар судалж өгөхийг хүссэн албан бичгийг явуулсан юм.

Гэвч тэрээр явуулсан хүсэлтээсээ татгалзах албан бичгийг саяхан Улсын дээд шүүх рүү явуулжээ.

Өөрөөр хэлбэл, албан бичигт дурдсан ял хойшлуулах болон хэргийг дахин судлуулах хүсэлтээсээ буцаж байгаа юм. Ийнхүү тэрээр татгалзах хүсэлт явуулснаар түүний гуравдугаар сарын 10-нд явуулсан албан бичиг хүчингүй болж байна.