ХӨСҮТ-өөс зонхилон тохиолдож буй томуу, томуу төст болон Улаанбурхан, Менингекоккт халдварын нөхцөл байдлын талаар мэдээлэл өглөө.

Улаанбурхан өвчний анх зөөвөрлөгдсөн тохиолдол буюу 2 сарын 18-ны өдрөөс хойш нийт өссөн дүнгээр 328 тохиолдол батлагдаж, дотоодын халдвар 323 болжээ.

Үүнээс Улаанбаатарт 160, Өмнөговь аймагт 98 , Дундговь аймагт 64, Хэнтий аймгаас 1 тохиолдол батлагдаад буй. Өнөөдрийн байдлаар эмнэлэгт 74, гэрээр 15, эдгэрч хяналтаас гарсан 239 тохиолдол байна. Түүнчлэн 9906 тохиолдлыг хавьтал гэж бүртгэжээ. 

Улаанбурхан өвчин нь амьсгалын замаар халддаг, халдварлалт өндөртэй учир иргэн бүр мэргэжлийн байгууллагаас өгч буй зөвлөмж сэрэмжлүүлгийг мөрдөх шаардлагатай байна. 

Тус өвчнийг ихэвчлэн 10-14 насны хүүхдүүд тусаж байгаа тул эцэг эхчүүд ийм насны хүүхдүүддээ вакцин хийлгэж, дархлаажуулахыг санууллаа. 

Өвчний үед гол илэрч буй шинж тэмдэг нь хоолой өвдөх, нүд улайх, нуухтах, суулгах, ханиах, тууралт гарах, халуурах байдаг. Хамгийн гол нь толбот гүвдрүүт тууралт гарч халуурах шинж тэмдгүүд илэрвэл эмчид заавал хандахыг зөвлөж байна. 

Харин Менингекоккт халдварын хувьд он гарснаас хойш 4 тохиолдол бүртгэгдсэн буюу Улаанбаатар хотоос 3, Архангай аймгаас 1 тохиолдол батлагдсан.