Ерөнхийлөгч Дональд Трампын сүүлийн тарифын мэдэгдлийн дараа Apple-ийн хувьцаа (AAPL) огцом буурч, хувьцааны үнэ 8.1 хувиар унажээ. Ингэснээр Microsoft (MSFT), Meta Platforms (META), Alphabet (GOOGL), Amazon (AMZN), Nvidia (NVDA), Tesla (TSLA) зэрэг шилдэг технологийн компанийн хувьцаануудын дунд хамгийн муу үзүүлэлттэй болж байна. 

Тодруулбал, АНУ-ын Ерөнхийлөгч Доналд Трамп импортын бараанд шинээр нэмэлт татвар тогтоох зарлигт гарын үсэг зурсан билээ. Татварыг тооцохдоо тухайн улсаас АНУ-ын бараанд оноодог татварын тал орчим хувьтай тэнцэхээр тогтоосон юм. Энэхүү зарлигаар Хятад улсад 34%-ийн тариф ногдуулахаар болсон нь Apple компанид сөргөөр нөлөөллөө. Учир нь Apple-ийн бүтээгдэхүүний 90-95 хувийг Хятадад үйлдвэрлэдэг бөгөөд гол нь дэлхийн хамгийн том iPhone үйлдвэрлэгч Foxconn компани юм. Ийнхүү энэхүү зарлигийн улмаас Apple-ийн хувьцааны үнэ 8.1%-иар унаж, зах зээлийн үнэлгээ нь 300 тэрбум ам.доллараар буурсан байна.

Зөвхөн Apple бус, Dell, HP зэрэг бусад технологийн компаниуд ч мөн энэхүү тарифын нөлөөгөөр хувьцааныхаа үнэд уналттай байна. Үүнээс гадна, зах зээлийн шинжээчид шинэ тарифууд нь Apple-ийн нийлүүлэлтийн сүлжээнд томоохон дарамт үүсгэж, цаашид бүтээгдэхүүний үнэд нэмэгдэл үүсгэж болзошгүй гэж үзэж байна.