Цахим спортын тамирчдыг төр дэмждэг, дэмждэггүй гэх маргаан, шүүмж хөвөрч буй.

Тэгвэл энэ талаар ЗГХЭГ-ын дарга С.Бямбацогт тэдний гаргасан амжилтаас татвар авахгүй. Харин дэмжсэн ААН-үүдийг нэг хувийн татварын хөнгөлөлтөд хамруулах хуулийн төсөл боловсруулж буйгаа илэрхийлжээ.

Тэр цахим сүлжээндээ ийнхүү бичсэн байна.

Манай хуульд нэг алдаа байсан. Тэр юу гэхээр төр дэмжээгүй хэрнээ бор зүрхээрээ яваад тив дэлхийгээс шагнал аваад ирэхээр нь баг тамирчдынхаа авсан шагналаас 10%-ийг нь шууд татварт хураачихдаг.

Урам нэмэхийн оронд аа чи шагнал авчихав уу гээд шийтгээд байгаа ч юм шиг.

Уг нь энэ алдааг засах, тамирчдаа дэмжихийн тулд олимпийн төрөлд амжилт гаргасан баг тамирчдыг дэмжсэн , хандив тусламж үзүүлсэн ААН-үүдэд борлуулалтын орлогынх нь 1% тай тэнцэх татварын хөнгөлөлт үзүүлдэг болсон.

Харин эндээс орхигдоод байсан E SPORT-ыг дэмжсэн ААН-үүдийг 1%-ИЙН ТАТВАРЫН ХӨНГӨЛӨЛТӨД ОРУУЛАХ хуулийн төслийг П.Сайнзориг гишүүн маань бичиж, Б.Бат-Эрдэнэ нарын гишүүдтэйгээ хамтран санаачилж өргөн барих гэж байна.

Хууль батлагдсанаар E SPORT-ын БАГ ТАМИРЧИД АМЖИЛТ ГАРГАЖ АВСАН ШАГНАЛААС төр татвар авахгүй, харин E SPORT-ыг дэмжсэн АЖ АХУЙН НЭГЖҮҮДИЙНХЭЭ ТАТВАРЫГ 1%-ИАР ХӨНГӨЛНӨ.

Хэлэлцүүлгийн явцад оюуны спорт, олон улсын чанартай олимпиад, шинжлэх ухаан, урлаг соёл, утга зохиолын шагналаас ч гэсэн татвар авахгүйгээр ХУУЛИЙН ҮЙЛЧЛЭХ ХҮРЭЭГ ӨРГӨЖҮҮЛЭХ бүрэн боломжтой гэж үзэж байгаа.

МОНГОЛ ХЭМЭЭХ НЭРИЙГ ЕРТӨНЦИЙН ЧИХНЭЭ ДУУРСГАЖ БУЙ МОНГОЛЧУУДДАА, ТЭДНИЙГ ДЭМЖИЖ БУЙ АЖ АХУЙН НЭГЖҮҮДДЭЭ ТӨР УРАМ ӨГӨХ УЧИРТАЙ.