Монголбанкны Ерөнхийлөгч Б.Лхагвасүрэн УИХ-ын дарга Д.Амарбаясгаланд Төрөөс Мөнгөний бодлогын талаар 2026 онд баримтлах үндсэн чиглэлийн төслийг өнөөдөр /2025.09.30/ өргөн барилаа.  

Монголбанкнаас ирэх онд хэрэгжүүлэх мөнгөний болон макро зохистой бодлогын хүрээнд:  

• Инфляцыг дунд хугацаанд 5 хувийн голчтой /+-2 нэгж хувийн интервалтай/ орчимд тогтворжуулахад чиглэсэн мөнгөний бодлогыг зах зээлийн зарчимд тулгуурлан хэрэгжүүлнэ. Ингэхдээ инфляцын одоогийн голч зорилт болох 6 хувийг 2027 оноос 5 хувь болгон бууруулах;   
• Макро-санхүүгийн харилцан нөлөөг харгалзан, санхүүгийн системийн болзошгүй эрсдэлийг үнэлж, удирдахад чиглэсэн макро зохистой бодлогыг мөнгөний бодлоготой хослуулан хэрэгжүүлэх;  
• Төгрөгийн гадаад валюттай харьцах ханш макро эдийн засгийн суурь хүчин зүйлтэй нийцсэн уян хатан тогтох зарчмыг баримталж, төв банкны бодлого, шийдвэрийг хүртээмжтэй хүргэх, хүлээлтийг удирдахад чиглэсэн олон нийттэй харилцах үйл ажиллагааг хэрэгжүүлж ажиллана.  

Банкны салбарын тогтвортой байдлыг хангах хүрээнд системийн эрсдэл даах чадварыг нэмэгдүүлэх, хяналт, шалгалтын олон улсын стандартад нийцүүлэх бодлогыг үргэлжлүүлнэ. Мөн Санхүүгийн хориг арга хэмжээ авах олон улсын байгууллага (ФАТФ)-ын зөвлөмж, стандартуудыг өөрийн үнэлгээний дүнд үндэслэн МУТСТ үндэсний бодлогыг шинэчлэх, олон нийтийн санхүү, эдийн засгийн суурь мэдлэгийг дээшлүүлэхэд чиглэсэн арга хэмжээг үргэлжлүүлэн ажиллана.   

Санхүүгийн захын дэд бүтэц, түүний институцыг бэхжүүлэх хүрээнд төлбөрийн системийн зохицуулалтыг боловсронгуй болгох, шинэ бүтээгдэхүүн, үйлчилгээг дэмжиж, stable coin-ыг төлбөрийн хэрэгсэл болгох боломжийг судалгааг эхлүүлнэ. Мөн банкны салбарын эрх зүйн шинэтгэлийг үргэлжлүүлэх, бизнесийн зээлийн хүртээмжийг нэмэгдүүлэх, зээлийн бүтээгдэхүүний нэр төрөл, хүрээг өргөжүүлэхэд чиглэсэн дунд хугацааны бодлогын арга хэмжээг боловсруулахаар Төрөөс мөнгөний бодлогын талаар 2026 онд баримтлах үндсэн чиглэлийн төсөлд тусгалаа.