НИТХ-ын ээлжит бус VIII хуралдааны хоёрдугаар хэлэлцүүлгээр нийслэлийн 2026 оны төсвийг баталлаа.

Төсвийн нийт хэмжээ 4.2 их наяд төгрөг бөгөөд суурь орлогыг 3.4 их наяд, суурь зарлагыг 2.6 их наяд төгрөгөөр тооцсон байна.

Мөн нийслэлийн төсвөөс улсын төсөвт 263.7 тэрбум, орон нутгийн хөгжлийн санд 42.6 тэрбум төгрөг төвлөрүүлэхээр тусгажээ.

Ирэх онд нийт 265 төсөл, арга хэмжээг хэрэгжүүлэхээр баталсан бөгөөд хөрөнгө оруулалтын бүтэц:

• 52.7% – Авто замын салбар
   
• 32.3% – Хот байгуулалт, инженерийн дэд бүтэц
   
• 8.2% – Нийгмийн салбар
   
• 6.8% – Бусад

Улмаар,

• 12 байршилд 53.74 км туслах гудамж зам,
   
• 33.8 км авто замын шинэчлэл,
   
• 2 байршилд гүүрэн гарц,
   
• “Туулын хурдны зам” 32 км-ийн бүтээн байгуулалтыг 2026 онд үргэлжлүүлэн барихаар тусгажээ.

Өмнөх жилүүдэд эхлүүлсэн 139 сургууль, цэцэрлэгийн барилга үргэлжлэн баригдах бөгөөд үүнээс нийслэлийн төсвөөр 44, дүүргийн төсвөөр 14 нь баригдаж байна.

2026 онд шинээр 6 сургууль, 3 цэцэрлэг, 1 цогцолбор барилга барих бөгөөд Азийн хөгжлийн банкны хөнгөлөлттэй зээлээр 18 шинэ барилга барих боломжийг судалж байгаа аж.

2026 оны төсвийг дараах гол чиглэлд тулгуурлан боловсруулсан хэмээн тайлбарлав.

1. Төр–хувийн хэвшлийн хамтын ажиллагааг өргөжүүлж, хотын эдийн засгийг тэлэх
2. Гэр хорооллыг орон сууцжуулах, агаарын бохирдлыг бууруулах
3. Холбоос замуудыг нэмэгдүүлж, нийтийн тээврийг шинэчилснээр түгжрэлийг бууруулах
4. Сургууль, цэцэрлэгийн хүртээмжийг сайжруулах
5. Эхлүүлсэн хөрөнгө оруулалтын төслүүдийг дуусгаж, суурь үйлчилгээний чанар, хүртээмжийг нэмэгдүүлэх