Эрүүл мэндийн сайд Ж.Чинбүрэн томуу, томуу төст өвчний нөхцөл байдал харьцангуй тогтвортой байгааг мэдээллээ.

Урьдчилан сэргийлэх арга хэмжээнүүдийн үр дүнд нэг ч хүүхэд эмнэлгийн коридорт хэвтээгүй, орны ашиглалт 80 хувьтай байгаа аж. Амбулаторийн үзлэгт ирэх тоо буурсан ч эрчимт эмчилгээнд байгаа хүүхдүүдийн тоо хараахан буураагүй байгааг анхааруулав.

Эцэг, эхчүүд хүүхдүүддээ маск тогтмол зүүлгэх, мөн улаанбурхан өвчний дэгдэлт нэмэгдэх хандлагатай байгааг сэрэмжлүүллээ.

ДОХ-ын халдвартай 12 иргэн хяналтаас алдагдсан нь үнэн болохыг хэлж, тэднийг илрүүлэх зорилгоор Эрүүл мэндийн яам, ХЗДХ-ийн яам, ТЕГ, ЦЕГ хамтарсан ажлын хэсэг байгуулсан гэв. Халдвартай иргэдийг хяналтад байлгах, эмчилгээг таслахгүй явуулах нь халдвар тархахаас сэргийлэхэд чухал гэдгийг онцолж, өвчтөний нууцлалыг чанд хамгаалж байгааг мэдэгдлээ.