Монголын цанын холбоо болон БНСУ-ын цанын багш нарын холбоо хооронд байгуулсан хамтын ажиллагааны санамж бичгийн хүрээнд Олон улсын дасгалжуулагч нарын нэгдүгээр шатны сургалт 2026 оны хоёрдугаар сарын 1-нээс 17-ны өдрийг дуустал зохион байгуулж байна.

Энэхүү сургалт нь Монгол Улсад өвлийн спорт, тэр дундаа цанын салбарт олон улсын стандарттай мэргэжлийн хүний нөөц бий болгох анхны суурь алхам болж байгаагаараа онцлог юм.

Өнөөдөр цанын спорт сонирхогчдын тоо нэмэгдэж, өвлийн аялал жуулчлал тэлж байгаа ч мэргэшсэн дасгалжуулагч, нэгдсэн стандартын дутагдал салбарын тогтвортой хөгжилд саад болж ирсэн.

Сургалтыг БНСУ-ын олон улсын сертификаттай, туршлагатай дасгалжуулагчид удирдан явуулах бөгөөд онол, практикийг хослуулсан, бодит талбайд суурилсан хөтөлбөрөөр хэрэгжинэ. Үүнд цанын дасгалжуулалтын суурь онол, аюулгүй ажиллагаа, сургалтын арга зүй, анхан болон өсвөр насны суралцагчидтай ажиллах стандарт, практик дадлага багтана.

Сургалтыг амжилттай дүүргэсэн оролцогчдод олон улсад хүлээн зөвшөөрөгдсөн "Level 1" дасгалжуулагчийн гэрчилгээ олгож, цаашид "Level 2", "Level 3" шатны сургалтад хамрагдах боломж нээгдэнэ. Ингэснээр Монгол Улсад цанын дасгалжуулагчийн шаталсан, системтэй бэлтгэлийн тогтолцоо бүрдэх нөхцөл бий болж байна.

Уг сургалт нь зөвхөн нэг удаагийн арга хэмжээ бус, Монголын цанын спортын чанарын шинэ шатанд шилжих, орон нутагт сургалтын бааз, клубуудыг мэргэжлийн боловсон хүчнээр хангах, улмаар өвлийн спорт, аялал жуулчлалын салбарын өрсөлдөх чадварыг нэмэгдүүлэх стратегийн ач холбогдолтой гэж зохион байгуулагчид онцолж байна.