Гол, усанд осолдох эрсдэлийг бууруулах, хүүхэд багачуудын бие бялдрыг чийрэгжүүлэх зорилгоор Чингэлтэй дүүрэг усанд сэлэх сургалтын хөтөлбөрийг хоёр дахь жилдээ хэрэгжүүлж байна.

Тус дүүрэг өнгөрсөн онд 1,400 хүүхдийг усанд сэлж сургах хөтөлбөрт үнэ төлбөргүй хамруулж, хүүхдүүдийн усанд аюулгүй орчинд байх мэдлэг, чадварыг дээшлүүлсэн байна.

Энэхүү ажлын үр дүнд хөтөлбөрийг энэ жил үргэлжлүүлж, эхний ээлжид 170 сурагчийг хоёр ээлжинд хуваан дүүргийн усан спортын зааланд сургалтад хамруулж эхлээд байна.

Сургалтын хүрээнд хүүхдүүд усанд зөв сэлэх үндсэн техникээс гадна усанд ослохоос урьдчилан сэргийлэх мэдлэг, аюултай нөхцөлд өөрийгөө болон бусдыг хамгаалах анхан шатны ойлголт, бие бялдар, тэсвэр хатуужлыг хөгжүүлэх дасгалуудыг цогцоор нь эзэмшиж байна.

Чингэлтэй дүүргийн хэмжээнд нийт 26 төрийн өмчит сургууль үйл ажиллагаа явуулдгаас одоогийн байдлаар 10 гаруй сургуулийн сурагчид уг хөтөлбөрт хамрагдаад байгаа бөгөөд цаашид хамрах хүрээг нэмэгдүүлэх зорилт тавин ажиллаж байна.

Сүүлийн жилүүдэд дулааны улиралд гол, нуур, усан сан орчимд хүүхэд эндэх тохиолдол давтагдсаар байгаа нь энэхүү хөтөлбөрийн ач холбогдлыг улам бүр тодотгож байгаа юм. Дүүргийн зүгээс хүүхэд бүрийг усанд сэлэх суурь чадвартай болгох нь амь нас, эрүүл мэндийг хамгаалах хамгийн үр дүнтэй урьдчилан сэргийлэлт гэж үзэж буйгаа онцолж байна.

Хөтөлбөр цаашид шат дараатай үргэлжилж, илүү олон сургууль, сурагчдыг хамруулах, мөн эцэг эхчүүдэд зориулсан усны аюулгүй байдлын зөвлөгөө, сургалтыг хавсран зохион байгуулахаар төлөвлөжээ.