Өмнөд Солонгос улсын Тагнуулын байгууллага өчигдөр буюу пүрэв гарагт Хойд Солонгосын удирдагч Ким Жон Ун өөрийн залгамжлагчаар өсвөр насны охин Ким Жү Эйг сонгосон гэж үзэж байгаагаа парламентын гишүүдэд мэдээлжээ. 

Ким Жон Уны гэр бүлийн талаарх мэдээлэл маш нууцлалтай байдаг тул түүний охины нас хараахан тодорхойгүй байгаа юм. Өмнөд Солонгосын Үндэсний Тагнуулын Алба (NIS) охины талаар хэд хэдэн нэмэлт мэдээлэл дурдахдаа түүнийг 10 орчим настай гэж мэдээлжээ. Мөн Ким Жү Эй морь унах, цанаар гулгах, усанд сэлэх дуртай бөгөөд Пхеньянд гэрийн сургуульд суралцдаг талаар мэдээлсэн юм.

Тэрээр сүүлийн саруудад томоохон үйл явдал, арга хэмжээнүүдэд аавынхаа хамт тогтмол оролцдог болсон. Сүүлд гэхэд өнгөрсөн оны есдүгээр сард Бээжин хотод Ким Жон Уныг айлчлахад тэр бас гадаадад анх удаагаа дагалдаж явсан юм.

Одоогоор Ким Жү Эйгээс өөр ямар ч хүүхэд олны нүдэнд гарч ирээгүй бөгөөд тэдний гэр бүлийг дор хаяж гурван хүүхэдтэй гэж үздэг байна. 

1948 оноос хойш Хойд Солонгосыг удирдаж, эцгийн эрхт ёсыг дээдэлж ирсэн улсын удирдагчаар эмэгтэй хүн томилогдох нь урьд өмнө огт төсөөлөгдөж байгаагүй шинэ үзэгдэл болох юм.

Өмнөд Солонгосын тагнуулын байгууллага өмнө нь Ким Жү Эйг бэлтгэгдэх шатандаа байгаа гэж үзэж байсан бол одоо залгамжлагчаар томилогдох шатандаа орсон гэж дүгнэжээ.