Байртай болчихвол Валентин тэмдэглэнэ

Од, Сараа хоёр үерхэж эхлээд гурван жилийг ардаа үджээ. Тэд хаяанд ирсэн хайрын баярыг бодох ч сөхөөгүй байна. Залуу хос өөрсдийн орох оронтой болъё гэсэн зорилготой тул тэр юм.

Тэнгэрт хадсан орон сууцны үнэ

Өнгөрсөн 2025 оны 11 дүгээр сарын байдлаар шинэ орон сууцны 1 метр квадрат талбайн дундаж үнэ 4.97 сая төгрөг байгаа бол хуучин орон сууцны дундаж үнэ яг адил дүнтэй байгаа юм. Яг энэ үнэлгээ нь өмнөх оны мөн үетэй харьцуулахад 11 хувиар өсжээ. Харин хуучин орон сууцны хувьд 13.9 хувиар өссөн үзүүлэлттэй байна. 

Цаашдаа ч орон сууцны үнэ өсөх хандлагатай байна.

2025 оны гуравдугаар улирлын байдлаар улсын нэрлэсэн дундаж цалин 2.7 сая төгрөгт хүрчээ. Дундаж цалинг хүйсээр авч үзвэл эрчүүд 3.0, эмэгтэйчүүд 2.5 сая төгрөгийн цалинтай байна. 

Билгүүний үндсэн цалин 2.7 сая төгрөг бол Сараагийнх 2.2 сая төгрөг. Яг энэ цалингаар тэд хэдэн жилийн дараа өөрсдийн гэсэн байртай болох боломжтойг тооцоолъё. 

Баасан ахын төрсөн өдрөөр ч гэртээ

Хосууд хариуцлагатай мөнгөө хуримтлуулах шаардлагатай тул зайлшгүй зардлаа хасаад, санхүүгийн дэглэм барьж буй.

Нийт цалин: 4.900.000 төгрөг

Татвар, шимтгэл, татвар……..

Хуульд зааснаар татвар нь албан татвар, төлбөр, хураамж зэргээс бүрддэг.

Од, Сараа хоёр тус тус үндсэн цалингаасаа:

• ХХОАТ 10 хувь
• НДШ 9.5 хувь (байгууллагаас мөн 11.5 хувийг төлсөн)

Од гар дээр 2,162,550 төгрөг, Сараа 1,766,300 төгрөг авдаг. 

Нийт орлого: 3.928.850 төгрөг

Түрээс

Од, Сараа хоёр Сүхбаатар дүүрэгт хоёр биедээ тохирсон нэг өрөө байр түрээсэлж амьдардаг. 

• Түрээс: 1,500,000
• СӨХ: 40,000
• Контор:  50,000

Нийт үлдэгдэл: 2.328.850 төгрөг

Зээл

2025 оны мөн үетэй харьцуулахад иргэдийн хэрэглээний зээл 21 хувиар өсжээ. Иргэдийн авдаг хэрэглээний зээлийн хамгийн түгээмэл бүтээгдэхүүнд цалингийн зээл, тэтгэврийн зээл, лизингийн үйлчилгээнүүд байдаг байна. 21 гэдэг тоо бол зөвхөн банкнаас авч буй зээлийн хувь. Гэвч иргэд банкнаас гадна банк бус болон аппликейшны зээлээс зээлийн хооронд хойд хормойгоороо урд хормойгоо нөхөж яваа билээ. Зөвхөн банкнаас зээл авсан иргэдийн тоо өнгөрсөн оны байдлаар 2.4 саяд хүрсэн бол ББСБ-аас авсан иргэдийн тоо 3.2 сад хүрчээ. Ийн давхардсан тоогоор 5.6 сая хүн ямар нэг байдлаар зээлтэй байна гэж үзвэл нэг хүн дор хаяж хоёр зээлтэй амьдарч байгаа юм.

Од, Сараа хоёр бол эдний нэг. Банкнаас зээл авч байгаа иргэдийн дундаж хэмжээ 19 сая төгрөг байгаа бол аппликейшнээр авч буй зээлийн дундаж хэмжээ 807 мянган төгрөг байна.

Ийнхүү тэд үлдсэн мөнгөнөөсөө зээлээ төлөх шаардлагатай боллоо. 

Нийт үлдэгдэл: 1.521.850 төгрөг

Өнгөрсөн оны гуравдугаар улирлын байдлаар өрхийн орлогын жилийн өсөлт 13.4 хувь байгаа бол зарлага нь 14.7 хувиар өсжээ.

Эдгээр үзүүлэлтээс харахад иргэдийн орлогын түвшин зарлагаа давж чадахгүйд хүрсэн тул хэрэглээний зээл авахаас өөр аргагүй нөхцөл байдалд хүрчээ. 

Үлдсэн мөнгөөрөө хоёр идэхгүй, хоосон хонохгүй

Мэдээж хүн л болсон хойно хоол, хүнсээ базаах нь гарцаагүй. 

Үхрийн цул мах гэхэд л нэг жил гаруйн хугацаанд 5378 төгрөгөөр өсжэээ.

2025 оны Өрхийн нийгэм, эдийн засгийн судалгаанд дурдаснаар нэг айл сард дунджаар 526 мянган төгрөгийг хүнсэнд зарлагддаг байна. 

Нийт үлдэгдэл: 995.850 төгрөг

Ийнхүү зайлшгүй зарлагаа хасаад үндсэн цалингийнхаа 10 хувь болох нийт 500.000 төгрөгийг сар бүр байрандаа зориулж хадгалахад Од, Сараа хоёр одоогийн ханшаар 33 жилийн дараа 40 метр квадрат байртай болох боломжтой.