Төрийн өмчийн орон сууцийг зорилтот бүлгийн иргэдэд хөлслүүлэх, өмчлүүлэх, борлуулах журам батлагдсан. Журмын хүрээнд төрийн өмчийн орон сууцанд иргэдэд 4 үндсэн хэлбэрээр ашиглуулах зохицуулалтыг тусгасан.

Үүнд:

• Төрийн өмчийн орон сууцыг иргэдэд түрээслүүлэх 
• Түрээслээд өмчлөх хэлбэр. Уг хэлбэр нь орон сууц худалдан авах, урьдчилгаа төлбөрөө бүрдүүлэх боломжгүй иргэд эхлээд түрээсээр амьдарч, тодорхой хугацаанд хуримтлал бүрдүүлсний дараа орон сууцаа өмчлөх боломжтой болно.
• Дахин төлөвлөлтийн хүрээнд газар болон эд хөрөнгийг орон сууцаар солих зохицуулалт
• Дахин төлөвлөлтийн үед иргэдийг орон сууцаар түр хангах

Тус журамд залуу гэр бүл, төрийн албан хаагч, ахмад настан, олон хүүхэдтэй өрх болон өрх толгойлсон гэр бүл, хөгжлийн бэрхшээлтэй иргэн зэрэг зорилтот бүлгийн иргэдийг тодорхой квотоор хамруулах зохицуулалтыг тусгасан. 

• Төрийн үйлчилгээний ажилтан (эмч, багш)- 25%
• Төрийн албан хаагч- 15%
• Ахмад настан- 18%
• Хөгжлийн бэрхшээлтэй иргэд- 10%

Түүнчлэн иргэдийг орон сууцанд хамруулах сонгон шалгаруулалтыг цахим хэлбэрээр (хур, дан) зохион байгуулж, төрийн мэдээллийн нэгдсэн системд тулгуурлан ил тод, нээлттэй хэрэгжүүлэх боломжтой болов. Харин ямар нэг байдлаар өөрийн нэр дээр орон сууц эзэмшдэг бол энэ шалгаруултад оролцох боломжгүй юм.

Энэхүү журам хэрэгжиж эхэлснээр “Ногоон нуур-1008 айл”, “Солонго-1,2”, “Залуус-1” зэрэг төрийн орон сууцны төслүүдэд иргэдийг хамруулах ажлыг нэгдсэн журмаар хэрэгжүүлэх боломж бүрдэж байна.

Журмаар төрийн өмчийн орон сууцны түрээсийн үнийг иргэдийн орлогод нийцсэн байдлаар тогтоохоор тусгах бөгөөд зах зээлийн ханшаас 2 дахин хямд байхаар тогтоох юм.

“Ногоон нуур-1008” айлын орон сууцны түрээслэх үнэ 594,000-653,400 төгрөг байхад тухайн бүсэд 50–60 м²-тай 2 өрөө байр 1,500,000-1,800,000 төгрөгийн өртөгтэй байна.