НИТХ-ын ээлжит VII хуралдаан эхэллээ. Хуралдаанаар хэлэлцэх асуудлыг НИТХ-ын дарга Д.Ихбаяр танилцууллаа. Өнөөдрийн хуралдаанаар Улаанбаатар хотод хэрэгжүүлж байгаа мега төслүүдийн хэрэгжилтийн явцын талаарх танилцуулга, Төр, хувийн хэвшлийн түншлэлээр нийслэлд хэрэгжүүлэх төслийн жагсаалтад нэмэлт оруулах тухай, Ажлын хэсэг байгуулах тухай зэрэг нийт 28 асуудлыг хэлэлцэж байна.

Нийслэлийн Засаг дарга бөгөөд Хотын дарга Х.Нямбаатар:

Улаанбаатар хотод хэрэгжүүлж буй мега төслүүдийн хэрэгжилт болоод явцын талаар мэдээлэл өглөө. Тухайлбал, гэр хорооллыг орон сууцжуулах ажлын хүрээнд Баянхошуу дэд төвд нийт 8000 айлын орон сууц барих бөгөөд одоогоор 110 айлын орон сууц ашиглалтад орсон байна. Түүнчлэн энэ жилдээ багтаад 426 айлын 13 блок барилгыг ашиглалтад оруулахаар ажиллаж байгаа аж. Мөн Ханын материалд нийт 3000 айлын орон сууцыг төр, хувийн хэвшлийн түншлэлээр хүрээнд барих бөгөөд гүйцэтгэгчээр “Материал импекс” компани шалгарч, барилга угсралтын ажлаа эхлүүлжээ. Улмаар бараа материалын үнийн өсөлттэй холбоотойгоор ихэнх мега төслүүдийн ТЭЗҮ-г дахин тодотгох зайлшгүй шаардлагатай байгаа талаар онцоллоо.

Танилцуулгатай холбоотойгоор НИТХ-ын төлөөлөгчид мега төслүүдийг хэрэгжүүлэхэд хөрөнгө оруулалтыг зөвхөн нийслэлээс бус төрөөс ямар нэг дэмжлэг байгаа эсэх, төслийн танилцуулгуудын тоон мэдээлэл зөрдөг, хэрэгжиж буй 16 мега төслийн сонгон шалгаруулалтыг шударга явуулж байгаад хэрхэн хяналт тавьж байгаа, олон нийтийн саналыг хэрхэн тусгасан, төсөл хариуцаж байгаа газруудын үйл ажиллагаа сул байгаа талаар асуулт асууж, тодруулга авлаа.

Мега төслүүдийн явц:

Улаанбаатар метро:

Төслийн ерөнхий гүйцэтгэгч компани сонгон шалгаруулах тендерийн 1-р шатанд сонирхлоо илэрхийлсэн 6 улсын 27 компани дунд тендерийн 2-р шатны үр дүнг 2026 оны 07 дугаар сарын 03-нд нээхээр байна.

Тусгай замын автобус:

Төслийн хувьд НЗДТГ-ын Хууль тогтоомж, гэрээ, эрх зүйн азраас “Хотын тээврийг сайжруулах замаар түгжрэлийг бууруулах төсөл”-ийн зээлийн хэлэлцээрт хууль зүйн дүгнэлт гарсан бөгөөд 2026 оны үйл ажиллагааны төлөвлөгөө, санхүүгийн төлөвлөгөө, худалдан авах ажиллагааны төлөвлөгөөг хэлэлцэн баталжээ.

Улаанбаатар трам шугам-1:

2026 оны 02-р сарын 13-ны өдөр Шугам-2,

03-р сарын 09-ний өдөр Шугам-1 Байгаль орчны нөлөөллийн нарийвчилсан үнэлгээний тайланг Байгаль орчин, уур амьсгалын өөрчлөлтийн яамны Мэргэжлийн зөвлөлөөр тус тус хэлэлцүүлэн дэмжигдсэн.

Дүүжин замын тээвэр:

19 багана угсрагдсан 2 өртөөний ажил хийгдэж байна. Ган татлага татах бэлтгэл ажил хангаж байна.

Нэгдүгээр тойрог зам төсөл:

Зураг төсөл, худалдан авалт, зам, замын байгууламжийн барилга угсралтын ажил, санхүүжилт (EPC+F)-ийн тендерийг 2025 оны 09 дүгээр сарын 11-ний өдөр зарласан бөгөөд 04 дугаар сарын 02-ны өдөр нээсэн.

Хоёрдугаар тойрог зам төсөл:

Зам, тээврийн яамны дэргэдэх мэргэжлийн зөвлөлөөр Хоёрдугаар тойрог зам төслийн техник, эдийн засгийн үндэслэлийг 2025 оны 12 дугаар сарын 17-ны өдөр хэлэлцүүлсэн бөгөөд санал, зөвлөмжийг тусган дахин хэлэлцүүлэхээр бэлтгэж байна.

Сэлбэ хот орон сууцжуулах төсөл:

Сэлбэ дэд төвийн орон сууцны цогцолбор хорооллын барилга угсралтын ажил эхэлсэн бөгөөд нийт төслийн явц 21 хувьтай үргэлжилж байна.

Туул усан цогцолбор:

Талууд ТЭЗҮ-н ажлыг эрчимжүүлэх, төслийн 1-р үе шат (далан боомт) болон 2-р үе шат (ус цэвэршүүлэх үйлдвэрийн ТЭЗҮ боловсруулах чиглэлээр санамж бичиг байгуулах, урьдчилсан нөхцөлүүдийг тохиролцохоор ажиллаж байна.

ДЦС-5:

Байгаль орчин, уур амьсгалын өөрчлөлтийн яамнаас төслийн Ерөнхий үнэлгээний дүгнэлт батлагдсан (БОУАӨЯ). “Дулааны тавдугаар цахилгаан станц” төслийн бүтээн байгуулалтын ажлыг эхлүүлнэ.

Дэд төвүүдийг түшиглэсэн орон сууцжуулах төсөл:

Дамбадаржаа, Толгойт, Шархад, Дэнжийн мянга зэрэг дэд төвүүдийн БУХ-ын гүйцэтгэл эхэлсэн.

Баянхошуу орон сууцжуулах төсөл:

226 айлын 6 блок орон сууцны барилга угсралтын ажил 60%-80% Шархад дэд төвийн 228 айлын 6 блок орон сууцны барилга угсралтын ажил 50%-75% “Эко хороолол ба орлогод нийцсэн орон сууцны сан”-гаар дамжуулан ногоон орон сууцны зээлийг хамтран санхүүжүүлэхарилжааны банкууд сонгогдсон.

Ханын материал орон сууцжуулах төсөл:

Төслийн эх загвар зураг эцэслэн батлагдсан ба барилга угсралтын ажлын зураг төсөл 95%-ийн гүйцэтгэлтэй мөн хангагч мэргэжлийн байгууллагуудаас техникийн нөхцөлүүдийг хүссэн төлөв байдалтай байна. Түүнчлэн гүйцэтгэгчийг шалгаруулсан бөгөөд барилга угсралтын ажил эхлүүлэх бэлтгэл ажлууд тус тус хийгдэж байна.

Лаг шатаах үйлдвэр:

Нийслэлийн Засаг даргын А/05 дугаар захирамжаар Бүрэн шинжилгээний ажлын хэсэг байгуулагдаж, нарийвчилсан судалгааг эхлүүлсэн.

Хог шатааж эрчим хүч үйлдвэрлэх үйлдвэр:

“Хог шатааж, эрчим хүч гаргах үйлдвэр” түншлэлийн төслийн зураг төсөл, төсвийг боловсруулах, барих, ашиглах, шилжүүлэх төрлийн урьдчилсан шалгаруулалтын сонгон шалгаруулалтыг дахин зарлаад байна.

Туулын хурдны зам:

Туулын хурдны замын эхний хэсгийн нарийвчилсан зураг төслийг боловсруулан, Зам, тээврийн хөгжлийн төвөөс 80/2026 дугаар Магадлалын ерөнхий дүгнэлт гаргуулсан. Туул хурдны зам төслийн үндсэн барилга угсралтын ажлыг эхлүүлээд байна.

Олон түвшний уулзвар:

Моносын уулзвар, Механик инженер, тээврийн сургуулийн уулзвар, Офицер уулзвар, Наадамчдын зам, явган гүүр болон Нарт хотхоноос зүүн тийш гүүр гэсэн таван байршилд зураг төсөл боловсруулагдаж батлагдсан. Таван байршилд инженерийн шугам сүлжээний зураг төсөл боловсруулах ажил дууссан бөгөөд Зам тээврийн хөгжлийн төвөөр магадлуулах ажил хийгдэж байна.

Хүннү хотын дэд бүтэц:

Хүннү хотын Хөгжлийн ерөнхий төлөвлөгөө, ажлын зураг төслийн дагуу хотын эхний ээлжийн дэд бүтцийн эх үүсвэрийн бүтээн байгуулалтын ажлууд үргэлжилж байна.

Хөрсний ус, үерийн хамгаалалт:

2025 оны 12 дугаар сарын 22-ны өдөр Барилгын хөгжлийн төвийн орон тооны бус мэргэжлийн зөвлөлийн хурлаар орж дэмжигдсэн. БОННҮ-г БИ ЖИ ЭМ ХХК гүйцэтгэж байгаа бөгөөд гүйцэтгэл 90%-тай үргэлжилж байна.Төслийн техник, эдийн засгийн үндэслэлийг шинэчлэн боловсруулах ажил 30 хувьтай үргэлжилж байна.

Эмээлт эко аж үйлдвэрийн парк:

Гүйцэтгэгч компанийн инженерийн техникийн багтай зураг тодруулга хийх ажил явагдаж байна. ДЦС байгуулах шаардлагатай БОННҮ-г батлуулахаар ажиллаж байна гэж НЗД мэдээллээ.