2026 оны гуравдугаар сарын 21-ний өдөр Ардчилсан намын дотоод сонгууль улс орон даяар болж өнгөрсөн билээ. Тус сонгууль Нийслэлийн Сүхбаатар дүүрэгт намын дүрмийн олон зүйл заалтыг зөрчиж шударга бус болсонтой холбогдуулан Сүхбаатарын дүүргийн Ардчилсан намын гишүүд Ардчилсан намын Хяналтын Ерөнхий хороонд дараах үндэслэлээр гомдол гаргасан юм.

-AN.mn сайтд иргэдийг өөрийнх нь зөвшөөрөлгүйгээр намд гишүүнээр элсүүлсэн,

-Төрийн албан хаагчдыг намын гишүүнээр бүртгэн санал өгүүлсэн, зохион байгуулалтайгаар нэг данснаас олон гишүүний татвар төлсөн,

-Хаягийн бүртгэлгүй, харьяалалгүй нийт 3000 гаруй иргэдийг дотоод сонгуулийн санал хураалтад оролцуулсан,

гэх мэт бусад ноцтой зөрчлүүдийн холбогдох баримт нотолгоог дотоод сонгуулийн үеэр Хяналтын дэд зөвлөлд, мөн Ардчилсан намын Хяналтын Ерөнхий хороонд хүргүүлжээ. Улмаар Ардчилсан намын Хяналтын Ерөнхий хороо хуралдаж Сүхбаатар дүүргийн дотоод сонгуулийг хүчингүйд тооцлоо.

Энэхүү гомдлыг Ардчилсан намын Хяналтын Ерөнхий Хорооны дунд суудлын хуралдаанаар хянан үзэж Ардчилсан намын Үндсэн дүрмийн Аравдугаар бүлгийн 83.1, 84.1, 84.1.9, 89.1, 89.2.1, 89.2.3, 94.1, 94.4, 94.5, 94.6.1, 94.7 дахь заалт, Арван наймдугаар бүлгийн 140.1, 140.2 дахь заалт, Хяналтын Ерөнхий Хорооны Сонгуулийн Хяналтын Дэд хорооны илтгэгч гишүүн С.Од-Эрдэнийн илтгэх хуудас, Сонгуулийн Хяналтын Дэд Хорооны 2026 оны 5 сарын 29-ний өдрийн дүгнэлт, ХЕХ-ны Дунд суудлын хуралдаанд оролцсон гишүүдийн саналыг тус тус үндэслэн гаргасан байна.

Сүхбаатар дүүрэгт Ардчилсан намын дотоод сонгуулийг дүрэм журамд нийцүүлэн зохион байгуулахыг Ардчилсан намын Ерөнхий нарийн бичгийн дарга С.Баярцогтод даалгалаа.