УИХ дахь АН, МАН-ын бүлэг хуралдаж, дараах шийдвэрүүдийг гаргасан байна. 

УИХ дахь АН-ын бүлгийн хуралдаанаар гурван асуудал хэлэлцжээ. 

1. Мэргэжлийн нэгдсэн холбоодын эрх зүйн байдлын тухай хуулийг хэлэлцэж, хүний эрх, ардчилсан тогтолцоо, иргэний нийгмийн байгууллагын эрх рүү халдсан олон заалт байгаа учир дэмжихгүй байхаар шийдсэн байна. Энэ талаар Бүлгийн дарга О.Цогтгэрэл "Мэргэжлийн холбоо байгуулахдаа заавал яамнаас зөвшөөрөл авч, таван жил тутамд сунгах юм байна" гэлээ. 
2. УИХ-ын чуулганы хуралдааны дэгийн тухай хуулийн талаар танилцуулга сонссон байна. 
3. Brain Drain буюу гадагшаа дайжиж буй үзэгдэл нэмэгдэж байгаа талаар ярилцсан байна. Энэ талаар Бүлгийн дарга О.Цогтгэрэл "Brain Drain-ий үзүүлэлт нэмэгдэж байна. Авлигын индексээр байр хойшлох тусам, залуус Монголоос дайжиж байна. Энэ бол шууд хамааралтай зүйл. Сүүлийн 8 жилд авлигатай тэмцэх тусам авлига нь ихэссээр байна. Залуус ажиллах тусмаа ядуурч байна. Энэ бол эрх баригчид 8 жил хэрхэн ажилласны үр дүн" гэв. 

Харин УИХ дахь МАН-ын бүлгийн хуралдаанаар УИХ-ын гишүүний тоо 126 болж буй учир УИХ-ын чуулганы хуралдааны дэгийн тухай хуульд зарим зарчмын зүйлсийг нэмээд, өргөн барихаар шийдсэн байна. 

Хуульд орж буй өөрчлөлтийн талаар УИХ-ын гишүүн Н.Энхболд "Сонгуулиар 95-аас дээш гишүүн сонгогдсон бол УИХ бүрэн эрхээ хэрэгжүүлнэ. 64 бас түүнээс дээш санал авсан намыг олонх болсон гэж үзнэ. Байнгын хороод өөрчлөгдөхгүй ч нэрийг нь бага зэрэг өөрчилнө. Байнгын хороо 19 гишүүнтэй байсныг 25 болгож, 2-оос илүүгүй байнгын хороонд харьяалагдаж ажиллахаар тусгаж байна. Ингэснээр салбараараа мэргэшиж ажиллах боломжтой болно" гэлээ.