Монгол Улсын Их Хурлын 2025 оны 62 дугаар тогтоолоор байгуулагдсан "Оюу толгой бүлэг ордын ашиглалтад Монгол Улсын эрх ашгийг хангуулах, хүртэх өгөөжийг нэмэгдүүлэхтэй холбоотой баримт бичиг, үйл ажиллагаанд хяналт шалгалт хийх" Хянан шалгах түр хорооны тайлан болон холбогдох баримт бичгийг УИХ-ын хяналт шалгалтын мэдээллийн санд байршуулсан байна.

Уг тайланд дурдсан онцлох мэдээллээс дурдъя.

• Түр хороонд цугласан 92,467 хуудас нотлох баримтын 51 хувь нь компанийн нууцын тамгатай байсан учир олон нийтэд мэдээлэх боломж хязгаарлагдмал байв. Компанийн зүгээс эдгээр нь дотоод журмаар олон нийтэд байнга гаргадаггүй мэдээлэл бөгөөд албаны бус зориулалтаар бусдад тараахаас сэргийлсэн тэмдэглэл болохоос биш түр хорооны хянан шалгах үйл ажиллагаанд саад болоогүй гэдгийг тайлбарласан.
• Сүүлийн 10 жилд ТЭЗҮ батлагдаагүй гэх асуудалд компанийн зүгээс гадаад, дотоод гэж хоёр өөр ТЭЗҮ байх боломжгүй, жил бүр тооцооллоо шинэчлэн явуулдаг бөгөөд Хөрөнгө оруулалтын гэрээний дагуу 5 жил тутамд ТЭЗҮ-ээ танилцуулдаг байна.
• Орд газрыг хамт олборлож болох ч эдийн засгийн үр өгөөж, санхүүгийн задаргааг салгаж, тодорхой болгох шаардлагатай гэж үзсэн.
• Татварын шийтгэлийн хуудас болон нөхөн ногдуулалтын актуудтай холбоотой маргааныг дотоодын шүүхээс гадна Лондоны олон улсын арбитрын шүүхэд (UNCITRAL) давхардуулан хандаж шийдвэрлүүлж байсан асуудлуудыг нэг мөр болгож хуулийн дагуу эцэслэн зохицуулах хэрэгцээ бий болсон.

Мөн УИХ-ын Тамгын газраас ажиглагчид болон иргэдийн мэдээллийн хүртээмжийг нэмэгдүүлэх үүднээс тус түр хорооны үйл ажиллагааны хүрээнд цугларсан нийт 41,406 хуудас нотлох баримтыг олон нийт нээлттэй үзэж, танилцах боломжтойгоор мэдээллийн санд нэгтгэн байршуулжээ.

Иргэд, олон нийт болон хэвлэл мэдээллийн байгууллагууд тус хянан шалгах түр хорооны цуглуулсан нотлох баримтуудтай УИХ-ын хяналт шалгалтын мэдээллийн сангийн нээлттэй холбоосоор шууд нэвтрэн танилцах боломжтой юм.

Ташрамд дурдахад УИХ-ын 2025 оны 62 дугаар тогтоолоор байгуулагдсан тус Хянан шалгах түр хорооны ажлын хэсгийн ахлагчаар УИХ-ын гишүүн О.Батнайрамдал ажилласан бөгөөд Э.Болормаа, С.Зулпхар, Б.Баярбаатар, Б.Бат-Эрдэнэ, Б.Жаргалан, Ө.Шижир, Д.Пүрэвдаваа, П.Ганзориг, Ш.Бямбасүрэн, М.Бадамсүрэн нарын 10 гишүүн бүрэлдэхүүнд нь ажиллажээ. Түр хорооны сонсгол 2025 оны 12 дугаар сарын 08, 10, 12-ны өдрүүдэд болсон юм.